Pơgê năr 21/4, tơ̆ Hơnih bơ̆ jang Kơdră chĕp pơgơ̆r teh đak, Thủ tướng Teh đak Phạm Minh Chính pơm tơm Pơm lêh sơng Thủ tướng Cộng hòa Séc Petr Fiala (Pê-tơ-rơ Phi-a-la)  păng Khul Kơdră tang măt teh đak Cộng hoà Séc năm tơmang Việt Nam đơ̆ng năr 20 truh năr 22/4. Pơm lêh sơng đei pơgơ̆r kiơ̆ trong pơgơ̆r ‘măn ăn bơngai chĕp kơ̆l Teh đak năm tơmang Việt Nam.

Thủ tướng Phạm Minh Chính sơng hơvơn Thủ tướng Petr Fiala vang hơlen Khul Tang măt Ƀô̆ đô̆i kon pơlei Việt Nam pơgơ̆r pơm lêh sơng, đơ̆ng rŏng ‘noh ƀar Thủ tướng tơroi tơbăt dih băl rim kơdră lơ̆m Khul tang măt kơdră kơpal kơ ƀar teh đak vang năm Pơm lêh. ‘Măng năm tơmang Việt Nam ‘noh jing ‘măng năm tơmang châu Á blŭng a đơ̆ng Thủ tướng Petr Fiala jô̆ đơ̆ng mă ƀok tŏk bơ̆ jang lơ̆m hơtuch sơnăm 2021 păng jing ‘măng năm tơmang blŭng a kơ bơngai kơdră chĕp kơ̆l teh đak Séc truh tơ̆ Việt Nam lơ̆m 15 sơnăm au ki. Lơ̆m ‘măng năm tơmang Việt Nam ‘măng mă au, lăp đơ̆ng rŏng pơma đam hăm Thủ tướng Teh đak Phạm Minh Chính, Thủ tướng Cộng hòa Séc Petr Fiala pơma dơnuh hăm Kơdră chĕp pơgơ̆r Teh đak Võ Văn Thưởng; atŭm hăm Thủ tướng Phạm Minh Chính vang năm Hop akŏm Hơnih mơdro sa Việt Nam – Séc păng mĭnh ƀar tơdrong jang kăl anai.