Lơ̆m ‘măng năm tơmang teh đak Cộng hòa Dân chủ Nhân dân  Lào, kơsơ̆ năr 11/01/2023, tơ̆ Hnam Kuô̆k hô̆i Lào, Thủ tướng Teh đak Phạm Minh Chính pơma dơnuh hăm Kơdră chĕp pơgơ̆r Kuô̆k hô̆i Lào Saysomphone Phomvihane.

Tơ̆ pơma dơnuh, Ƀar ‘nu Kơdră chĕp pơgơ̆r sơkơ̆t hơdăh hơnơ̆ng lăng kơjăp păng iung jang kăl hlŏh lơ̆m hơmet pơ ‘lơ̆ng tơgoăt tơgoăl gĭt kăl păng jang hơdoi tôm tong Việt Nam - Lào; tơgoăt jang hơdoi ƀar păh oei hơnơ̆ng vei kơjăp hơyak atŏk tơ iung tơ̆ đĭ đăng tơdrong. Kơdră chĕp pơgơ̆r Kuô̆k hô̆i Lào  ‘mĕh vă hơnơ̆ng tơgoăt kơjăp jang hơdoi ƀar păh Kuôk hô̆i ƀar Teh đak. Kơdră chĕp pơgơ̆r Kuôk hô̆i Lào jei bơnê kơ Việt Nam hlôi tơgŭm djru tih tên ăn Lào lơ̆m khei năr au ki, lơ̆m au tơdrong Man pôk ăn Hnam Kuô̆k hô̆i Lào; pơma hơdăh ling lang tơgŭm djru ư̆h pơdơ̆h păng pơm kơtang hlŏh dơ̆ng tơgoăt tơgoăl jang hơdoi gĭt kăl păng tôm tong Việt Nam- Lào.