Kơsơ̆ brei, năr 28/11/, tơ̆ Hơnĭh bơ̆ jang Khŭl kơdră chĕp pơgơ̆r Tĕh đak, Thủ tướng Tĕh đak Phạm Minh Chính hlôi pơma dơnŭh păng điên thoăi hăm Thủ tướng Phalăng Elisabeth Borne  vă pơma dơnŭh rim trong atŏk kơtang tơgoăt tơgoăl Jang hơdoi gĭt kăl Việt Nam - Phalăng, mă kăl lơ̆m jang hơdoi mŭk drăm, mơdro sa, tơmơ̆t jên jang, yak trŭh tơbăt 50 sơnăm pơjing tơbôl Việt Nam-Phalăng păng 10 sơnăm Jang hơdoi gĭt kăl lơ̆m sơnăm 2023.  

Hlŏh đơ̆ng pơma dơnŭh, ƀar Thủ tướng sơkơ̆t hơdăh, jang hơdoi mŭk drăm jing tơdrong kăl hlŏh lơ̆m tơgoăt tơgoăl jang hơdoi gĭt kăl Việt Nam-Phalăng; tơbăt dĭh băl păng pơma dơnŭh dĭh băl dôm tơdrong tơlĕch jang rim tơdrong vă jang hơdoi mŭk drăm tơm lơ̆m tơgoăt tơgoăl ƀar tĕh đak, mă kăl ‘nŏh tơdrong vă jang Trong gre treng tơring Kơdrơ̆m Nhổn - cham gre treng Hà Nội, hrô̆ih hơnhăk trong tơ̆ kơpal pơm keh đang ăn gre treng rok gơ̆h lơ̆m vă đĭ sơnăm au. Thủ tướng Phalăng Elisabeth Borne pơma tơbăt jơhngơ̆m đon mĕh vă atŏk kơtang jang hơdoi hăm Việt Nam lơ̆m rim tơdrong jang mŭk drăm kơsô̆, tơplĭh kơsô̆, trong năm păng mă kăl ‘nŏh ŭnh hơyŭh jơ̆ng ‘năr kial, đak; drơ̆ng mĭnh nơ̆r atŏk kơtang tơlĕch jang tôm tong, jơnei vă tơgĕch rim tơdrong rơvơn tĭh tên kơ Tơdrong tơchơ̆t Mơdro sa hiôk hian Việt Nam - EU (EVFTA). Thủ tướng Tĕh đak Phạm Minh Chính athei Phalăng pơjing rơvơn ăn rim tơmam drăm chŏh jang sa kiơ̆ pơyan kơ Việt Nam gơ̆h tĕch mơdro tơ̆ Phalăng; adoi athei Phalăng hrôih kĭ tơchơ̆t Tơdrong tơchơ̆t dơ̆ng pang tơmơ̆t jên jang EU - Việt Nam (EVIPA) vă pơjing jơhngơ̆m pran ăn atŏk kơtang tơgoăt tơgoăl tơmơ̆t jên jang kơ ƀar păh păng pơtrŭt Dơnŏ anĭh bơ̆ jang châu Âu (EC) hrôih sut hŭt “tang găn” hăm ka hơdang Việt Nam.