VOV4.Bahnar - ‘Năr 11/5/2022, ƀlep ƀơ̆t vang truh Hop akŏm tih gĭt kăl ASEAN - Hoa Kỳ, năm tơ mang păng bơ̆ jang tơ̆ Mi păng Liên Hợp Quốc, tơ̆ Anih tơm Washington DC, Mi, Thủ tướng teh đak Phạm Minh Chính hlôi sơng kơ dră tơm vei lăng jên hu Mi Janet Yellen. Tơ̆ jơ sơng, Thủ tướng teh đak hơ len lăng lơ̆m tơ drong pơ vei jang hơ dai tôm tơ drong Việt Nam - Mi, jang hơ dai đơ̆ng 2 teh đak găh mŭk drăm - mơ dro sa păng jên hu khei ‘năr âu ki đei hơ yak hơ tŏk tơ iung ‘lơ̆ng.

 Thủ tướng athei Khŭl kơ dră teh đak păng Anih tơm vei lăng jên hu Mi tơ gŭm păng jang hơ dai kơ jăp hăm Việt Nam găh hơ tŏk tơ iung mŭk drăm, hơ met pơ ‘lơ̆ng dôm long nol jơ̆p plei teh, lơ̆m noh đei tơ drong tơ plih ŭnh hơ yuh păng bơ̆ jang kiơ̆ nơ̆r pơ kăp tơ̆ COP26, jang hơ dai vă pơ jing dôm trong jang mŭk drăm tơ ring, sơ đơ̆ng tơ drong pơ vei mơ dro sa. Thủ tướng ‘meh vă Mi vang tơ roi tơ drong hlôh vao hơ tŏk tơ iung mơ dro sa jên hu, mă loi ‘noh jĭ mơ dro sa chứng khoán, tĕch mơ dro hnam, teh 1 trong ‘lơ̆ng hơ iă, sơ đơ̆ng, tơ păt tơ gop sơ đơ̆ng mŭk drăm tih.

Thuem: Tơ blơ̆