VOV4.Bahnar - ‘Năr 18/8, tơ̆ Anih bơ̆ jang kơ Khŭl kơ dră teh đak, Thủ tướng teh đak Phạm Minh Chính hlôi sơng pơ ma dơ nuh hăm Phŏ Thủ tướng, Kơ dră tơm jang tơ bôl Kazakhstan Mukhtar Tileuberdi ƀlep ƀơ̆t ‘măng năm tơ mang tơ̆ Việt Nam đơ̆ng ‘năr 17-18/8. Thủ tướng Phạm Minh Chính pơ ma hơ dăh Việt Nam ling lang lăng kăl tơ drong pơ vei tơ bôl joăt joe păng jang hơ dai lơ tơ drong hăm Kazakhstan.

Vă pơ trŭt pran kơ tang hloh dơ̆ng jang hơ dai đơ̆ng 2 teh đak tơ̆ hơ năp kơnh, Thủ tướng Phạm Minh Chính athei 2 păh hơ tŏk hơ năp jang đơ̆ng Anih jang 2 khŭl kơ dră teh đak Việt Nam- Kazakhstan găh jang hơ dai mŭk drăm- mơ dro sa păng khoa hŏk - ki thuơ̆t, pơ ma đam kĭ tơ drong Tơ chơ̆t gơh năm mơ̆t lĕch ăn kon pơ lei 2 teh đak kŭm nhen hơ drin jang hơ dai hrôih pơ jing trong gre treng păng trong păr tơ păt đơ̆ng Việt Nam păng Kazakhstan. 2 păh kŭm hlôi pơ ma dơ nuh găh dôm tơ drong apŭng plĕnh teh păng tơ ring vang bơ ngơ̆t truh, lơ̆m noh đei tơ drong Biển Đông.

Thuem: Tơ blơ̆