VOV4.Bahnar - Pơgê năr 17/10/2022, Thủ tướng Tĕh đak Phạm Minh Chính sơng pơma dơnŭh hăm Kơdră chĕp pơgơ̆r Mơdro sa păng pơm tơlĕch tơmam drăm Australia Tim Ayres (Tim E-xơ) ƀlep lơ̆m jơ ‘năr năm tơ̆ Việt Nam adoi chĕp pơgơ̆r Hop akom kơdră kpal OECD – Đông Nam Á 2022 tơ̆ Hà Nội.

Thủ tướng Tĕh đak Phạm Minh Chính sơng pơma dơnŭh hăm Kơdră chĕp pơgơ̆r Mơdro sa păng pơm tơlĕch tơmam drăm Australia

Thủ tướng athei ƀok Tim Ayres lăng ba kơ jăp hlŏh dơ̆ng jang hơdoi mŭk drăm-mơdro sa-tơmơ̆t jên jang ƀar păh teh đak, lơ̆m au đei tơdrong Austraylia hơnơ̆ng pơ̆ih să hơnĭh tĕch mơdro rim tơmam drăm chŏh jang sa, ka hơdang Việt Nam; pơjing rơvơn ăn hơnĭh mơdro sa Việt Nam tơmơ̆t jên jang tơ̆ Austraylia, adoi pơtrŭt hơnĭh mơdro sa Australia atŏk kơtang tơmơ̆t jên jang lơ̆m Việt Nam. Thủ tướng jei athei Australia pơjing rơvơn ăn kon pơlei Việt Nam tơ̆ Australia erĭh sa, jang sa, vang oei sa ‘lơ̆ng hơ iă tơ̆ au. Ƀok Tim Ayres sơkơ̆t hơdăh, Khŭl kơdră Austraulia ling lang lăng gĭt tơgoăt tơgoăl Jang hơdoi gĭt kăl hăm Việt Nam păng ‘mĕh vă tơgoăt kơ jăp tơgoăt tơgoăl dĭh băl hăm Việt Nam; pơtrŭt kơtang hlŏh dơ̆ng jang hơdoi hăm Việt Nam lơ̆m rim tơdrong jang mŭk drăm-mơdro sa-tơmơ̆t jên jang, chŏh jang sa, pơtho pơhrăm, jŏh ayŏ, bơngai jang.

VOV/Amazưt tơblơ̆