Vov4.Bahnar - Kơsơ̆ brei, năr 11/7, tơ̆ Hơnĭh bơ̆ jang Khul Kơdră tĕh đak, Thủ tướng Tĕh đak Phạm Minh Chính sơng pơma dơnŭh hăm Kơdră jang Tơbôl, Kơdră vei lăng Mơdro sa păng Lui khop Argentina, ƀok Santiago Andres Cafiero ƀlep lơ̆m ‘măng năm tơmang tĕh đak Việt Nam đơ̆ng năr 09 - 11/7.

Tơ̆ jơ tơ ƀơ̆p, Thủ tướng athei ƀar păh iung jang hơdoi kơ jăp vă pơtrŭt kơtang rim ‘măng năm tơmang păng tơ ƀơ̆p dĭh băl kơdră kơpal, tơ iung pơjing trong hơmet ăn tơbăt 50 sơnăm năr pơjing tơbôl ƀar tĕh đak lơ̆m sơnăm 2023 kơnh; vei kơ jăp iung jang hơdoi, tơgŭm djru dĭh băl tơ̆ rim khŭl jang apŭng plĕnh tĕh păng hop akom lơ pang, tơgop git kăl lơ̆m xek tơlang rim tơdrong lơ̆m tơring păng lơ̆m plei tĕh. Kơdră jang tơbôl Argentina ‘mĕh vă hơnhăk tơdrong Tơgoăt tơgoăl jang hơdoi tôm tong hăm Việt Nam tŏk lơ̆m kơ nao ‘nao. Kơdră jang tơbôl pơkăp gô pơtrŭt athei rim Kơdră chĕp pơgơ̆r hơnĭh tơm jang păh Argentina iung jang hơdoi hăm Việt Nam hơnhăk tơgoăt tơgoăl păng jang hơdoi lơ tơdrong ƀar păh Việt Nam hăm Argentina roi năr roi ‘lơ̆ng hơ iă, jơnei hlŏh dơ̆ng; lăng trŭh tơ iung pơjing tơgoăt tơgoăl gĭt kăl lơ̆m rim tơdrong jang ŭnh hơyŭh păng chŏh jang sa kơ yuơ đei iŏk yua ăn kon pơlei pơ đĭ ƀar tĕh đak.

Tơblơ̆ nơ̆r: Amazưt