VOV4.Bahnar - Năr 30/3/2022 tơ̆ Hơnĭh bơ̆ jang Khŭl kơdră Tĕh đak, Thủ tướng Tĕh đak Phạm Minh Chính hlôi sơng pơma dơnŭh hăm Kơdră chĕp pơgơ̆r Dơnŏ anĭh tang măt tĕh đak Mi tơ̆ Việt Nam Marc Evans Knapper năm trŭh kuh ka hla bat ƀlep lơ̆m jơ ƀok iŏk bơ̆ jang pơm Kơdră tang măt tĕh đak. Tơ̆ jơ sơng, Thủ tướng hmach chơt hơ iă kơ ƀok Marc Evans Knapper hlôi đei Ƀok Kơdră tơm Joe Biden pơjao tơdrong jang ‘nao păng vĭh hơlơ̆k tơ̆ Hà Nội bơ̆ jang hăm kơ chư̆k Kơdră tang măt tĕh đak; pơma tơbăt jơhngơ̆m đon lui hăm tơdrong jang hle, Kơdră tang măt gô hơnơ̆ng tơgop hlŏh dơ̆ng ăn tơgoăt tơgoăl Jang hơdoi tôm tong ƀar tĕh đak. Thủ tướng sơkơ̆t dơ̆ng Mi ‘nŏh mĭnh lơ̆m dôm tĕh đak jang hơdoi tơm kơ Việt Nam păng Việt Nam ‘mĕh vă atŭm hăm Mi hơnơ̆ng hơnhăk tơgoăt tơgoăl Jang hơdoi tôm tong kơtang hlŏh dơ̆ng, iŏk đei jơnei, tơpă ‘moi kiơ̆ trong yom kiơ̆ dĭh băl pơm tơm kơ dĭh, keh kong groi tĕh, trong jang chĭnh trĭ păng tơdrong pha dĭh băl. Kơdră tang măt tĕh đak Mi Marc Evans Knapper pơma tơbăt jơhngơ̆m đon đei vĭh hơlơ̆k bơ̆ jang dơ̆ng tơ̆ Việt Nam, hôn bơnê kơtang tơdrong atŏk tơ iung kơ Việt Nam lơ̆m rim tơdrong, mă kăl lơ̆m tang găn jĭ hơbŭh păng hơmet pơ ‘lơ̆ng atŏk tơ iung mŭk drăm đơ̆ng rŏng jĭ hơbŭh.

Tơblơ̆ nơ̆r: Amazưt