VOV4.Bahnar - Kơsơ̆ năr 14/3, Thủ tướng Tĕh đak  Phạm Minh Chính, Kơdră chĕp pơgơ̆r Dơnŏ anĭh chĕp pơgơ̆r tang găn jĭ hơbŭh Covid-19 hlôi vang năm pơm lêh tơ ƀơ̆p mŭh măt bơnê rim khŭl jang hơdoi apŭng plĕnh tĕh tơgŭm djru Việt Nam tang găn jĭ hơbŭh covid-19 kơ yuơ Dơnŏ anĭh tơm jang Tơbôl jang hơdoi hăm rim hơnih bơ̆ jang Liên hợp quốc tơ̆ Việt Nam pơgơ̆r. Tơ̆ pơm lêh tơ ƀơ̆p mŭh măt, Thủ tướng Phạm Minh Chính tơbăt, sơ năm 2022, Việt Nam hơdrin jing sơnăm jơnei tang găn kĕ jĭ hơbŭh, ƀrư̆ ƀrư̆ yak mơ̆t “khei ‘năr sơđơ̆ng hle” hăm jĭ hơbŭh Covid-19, pơtrŭt kơtang hơmet pơ ‘lơ̆ng, atŏk tơ iung mŭk drăm-tơpôl kơ jăp ‘lơ̆ng, vei lăng năng tông erĭh sa ăn kon pơlei. Tơ̆ hơnăp jĭ hơbŭh rŏ năng oei kơtang, hăm trong tơlĕch jang hơnơ̆ng tang găn tơpŏh, ư̆h kơ lê̆ pơm ăn tơdrong jang pơgang tơ ƀơ̆p tơnap tap, Việt Nam, tŏk bŏk iung janh tĕnh koăng lơ̆m ƀet keh đang vaccine jrŭm mă 3 ăn dôm bơngai hlŏh 18 sơnăm păng ƀet keh đang jrŭm mă 2 ăn dôm bơngai đơ̆ng 12 - 17 sơnăm; hơmet ăn ƀet ăn hơ iŏh đơ̆ng 5-11 sơnăm, chă tơchĕng hơlen ƀet jrŭm mă 4 păng ƀet ăn hơ iŏh tim mă trŭh 5 sơnăm; atŏk kơtang tơdrong jang pơgang gơ̆h hơgei, mă kăl tơdrong jang pơgang tang găn hơlau păng jang pơgang tơ̆ tơring; tơlĕch jang kiơ̆ jơnei tơdrong jang tang găn jĭ hơbŭh Covid-19 mă ‘lơ̆ng hơ iă.

Tơblơ̆ nơ̆r: Amazưt