VOV4.Bahnar - Pơgê năr 22/8, tơ̆ Hà Nội, Thủ tướng Tĕh đak Phạm Minh Chính vang năm Hop akŏm tơbăt păng tơlĕch jang kiơ̆ Tơdrong tơchơ̆t kơsô̆ 8 đơ̆ng Dơnŏ anĭh tơm Chĭnh trĭ găh atŏk kơtang atŏk tơ iung kmăi kmŏk vei lăng sơđơ̆ng tĕh đak trŭh sơnăm 2030 păng dôm sơnăm đơ̆ng rŏng kơ yuơ Hơnĭh jang Đảng Ƀô̆ đô̆i Trung ương - Dơnŏ anih tơm Ƀô̆ đô̆i vei lăng sơlam tĕh đak pơgơ̆r.

Iung pơma tơ̆ hop akom, Thủ tướng Tĕh đak Phạm Minh Chính pơma hơdăh, Tơdrong tơchơ̆t kơsô̆ 08 tơƀô̆h hơdăh tơdrong lăng ba kơtang, tơdrong hơmŏ tôch ai păng lui kiơ̆ kơ jăp kơ Đảng, Tĕh đak păng Kon pơlei hăm hơnĭh jang Kmăi kmŏk vei lăng sơđơ̆ng Tĕh đak, tơlĕch lơ trong jang ăn tơ iung pơjing Khŭl Ƀô̆ đô̆i trŭh sơnăm 2025 keh kong, kơ toei, pran kơtang, pơjing hơyak kơ jăp iăp kơtang, hơdrin trŭh sơnăm 2030 tơ iung pơjing Khŭl Ƀô̆ đô̆i kon pơlei gơ̆h hơgei, hơbĕch hơbal. Adoi, tơdrong jang kiơ̆ Tơchơ̆t kơsô̆ 08 jei tơgop pơtrŭt kơtang bơ̆ jang hăm kmăi kmŏk kơ tĕh đak, tơ iung pơjing bơ̆ jang mŭk drăm pơm tơm kơ dĭh, iung jang, kơrŭn đĭ jơhngơ̆m vang mơ̆t hơdoi lơ̆m apŭng plĕnh tĕh kơtang, lang să, tơpă păng jơnei.

Tơblơ̆ nơ̆r: Amazưt