VOV4.Bahnar - Pơgê năr 5/9, lơ̆m jơ ‘năr chơt hơ iă kơ năr năm tơ̆ hnam trương, Thủ tướng Tĕh đak Phạm Minh Chính hmach chơt hơ iă hlŏh ăn rim kang ƀô̆, ƀok thây kô, bơngai jang pơtho pơhrăm atŭm hăm rim kôn mon kon sau hŏk tro lơ̆m tĕh đak păng Hnam trương jăl kơđĕh Đoàn Thị Điểm ƀlep lơ̆m jơ ‘năr mơ̆t hŏk sơnăm ‘nao.

Thủ tướng iung pơma kơkŭh chơt hơ iă sơnăm hŏk ‘nao

Thủ tướng ‘mĕh vă lơ̆m dôm năr năm tơ̆ hnam trương rim kôn mon kon sau gô đei hŏk pơhrăm dôm tơdrong jơhngơ̆m đon ‘lơ̆ng păng băt ‘mêm kơ eng pơlei pơla, tĕh đak. Băt chu yom mĕ ƀă yă ƀok, ƀok thây kô vei lăng năng tông. Rim đe mon gô hŏk đei dôm tơdrong hơdrin, kơrŭn đĭ jơhngơ̆m, erĭh đei jơhngơ̆m đon hơpơi ‘mĕh vă ‘lơ̆ng hơ iă, mă kăl đơ̆ng dôm bơngai nuih mơng pran kơtang oei sa ‘lơ̆ng sơ̆ ki kơ hơdrĕch hơdrung. Hăm rim hơnĭh tơm, hơnĭh jang, mă kăl ‘nŏh Dơnŏ anĭh tơm vei lăng Hnam trương pơtho pơhrăm kăl akŏm xek tơlang dôm tơdrong jang tim mă lăp, tim mă ƀlep păng dôm tơdrong đei ƀô̆h dang ei. Tơdrong jang tơ̆ hơnăp kăl hrôih sek tơlang đang 3 tơdrong ư̆h kơ măh, ‘nŏh ư̆h kơ măh ƀok thây kô pơtho - ư̆h kơ măh lăm hŏk- ư̆h kơ măh kơsơ̆p hla bơar hŏk pơhrăm. Pơm kiơ̆ ƀet vaccine tôm, jơnei vă đe kôn mon kon sau pran jăng grăng akau năm hŏk pơhrăm, mĕ ƀă sơđơ̆ng jơhngơ̆m jang sa, ƀok thây kô pơtho sơđơ̆ng jơhngơ̆m pơtho pơhrăm.

Tơblơ̆ nơ̆r: Amazưt