‘Nau jing mĭnh tơdrong pơgơ̆r gĭt kăl hlŏh vă pôk pơ ư dôm hơnăn tơmam drăm, tĕch mơdro ‘lơ̆ng, tơƀô̆h hơdăh tơdrong atŏk tơ iung kơtang đơ̆ng khŭl hơnĭh mơdro sa Việt Nam păng tơdrong jang muk drăm, tơgop hơnhăk hơnăn Việt roi năr roi ‘lơ̆ng liĕm păng hơ iă hlŏh dơ̆ng lơ̆m tĕch mơdro lơm tĕh đak păng tĕh đak đe.

Thủ tướng Phạm Minh Chính chă tơmang lăng pơdă tơmam drăm iŏk đei Hơnăn tĕh đak Việt Nam sơnăm 2022. (Rup: TTXVN)

Gơmăng năr 2/11, tơ̆ Hơnĭh tơm hop akŏm tĕh đak, Thủ tướng Tĕh đak Phạm Minh Chính vang năm pơm lêh Tơbăt hơdăh tơmam drăm iŏk đei Hơnăn tĕh đak Việt Nam ‘măng mă 8, sơnăm 2022. ‘Nau jing mĭnh tơdrong pơgơ̆r gĭt kăl hlŏh vă pôk pơ ư dôm hơnăn tơmam drăm, tĕch mơdro ‘lơ̆ng, tơƀô̆h hơdăh tơdrong atŏk tơ iung kơtang đơ̆ng khŭl hơnĭh mơdro sa Việt Nam păng tơdrong jang muk drăm, tơgop hơnhăk hơnăn Việt roi năr roi ‘lơ̆ng liĕm păng hơ iă hlŏh dơ̆ng lơ̆m tĕch mơdro lơm tĕh đak păng tĕh đak đe. Đơ̆ng rŏng vă jê̆ 20 sơnăm tơlĕch jang, hơnĭh mơdro sa đei tơmam drăm iŏk đei Hơnăn tĕh đak hơnơưng roi lơ kiơ̆ rim sơnăm, đơ̆ng 30 hơnĭh mơdro sa lơ̆m sơnăm 2008 tŏk trŭh 172 hơnĭh mơdro sa lơ̆m sơnăm 2022.  172 hơnĭh mơdro sa iŏk đei Hơnăn tĕh đak sơnăm 2022 jang sa iŏk đei hơ iă hăm akŏp tĕch mơdro iŏk đei lơ̆m sơnăm 2021 dang 1.570 rơbau ti hlak jên, ba ăn hơnĭh mong jên bơ̆ jang tĕh đak vă jê̆ 129.000 ti hlak jên, pơjing tơdrong jang, jang sa iŏk đei ăn vă jê̆ 600.000 ‘nu bơngai, jang kiơ̆ ‘lơ̆ng rim trong jang vei lăng sơđơ̆ng erĭh sa tơpôl păng hơnăp jang tơpôl kơ hơnĭh mơdro sa. Tang măt ăn kơdră chĕp pơgơ̆r Đảng, Tĕh đak, Thủ tướng Phạm Minh Chính hmach chơt hơ iă ăn 172 hơnĭh mơdro sa đei tơmam drăm iŏk đei Hơnăn tĕh đak sơnăm 2022; adoi pơma hơdăh, tơdrong jang tơ iung pơjing păng atŏk tơdrong gĭt kăl jơ hơnăn tĕh đak păng ‘nau jing tơdrong jang tôch trăp trĭn mă lei tôch chơt hơ iă kơ khŭl mơdro sa, bơngai mơdro sa Việt Nam.