VOV4.Bahnar - Gơ măng ‘năr 31/5, tơ̆ Anih jang kơ đe hơ ioh Hà Nội, Thủ tướng teh đak Phạm Minh Chính vang pơm Lêh tơ lĕch jang Khei bơ̆ jang yua kơ hơ ioh păng pơ tơm blŭng a pơ yan he sơ năm 2022 hăm hơ năn: “ Vang tơ gŭm vei lăng, pơ tho pơ hrăm păng vei lăng hơ ioh” vă krao hơ vơn tơ drong vang jang ‘lơ̆ng hloh dơ̆ng đơ̆ng rim khŭl jang chĭnh trĭ - tơ pôl, ŭnh hnam păng tơ pôl lơ̆m tơ drong vei lăng, pơ tho pơ hrăm păng vei lăng hơ ioh. Jơ pơm lêh đei dang 1.200 ‘nu bơ ngai tang măt, lơ̆m noh đei vă jê̆ 700 ‘nu hơ ioh tang măt ăn kơ hloh 25 triệu ‘nu hơ ioh lơ̆m teh đak vang akŏm. Pơ ma tơ̆ jơ pơm lêh, Thủ tướng teh đak Phạm Minh Chính hmach kơ 700 ‘nu mon đei măt tơ̆ âu păng 25 triệu ‘nu hơ ioh lơ̆m teh đak kŭm hăm ŭnh hnam, đe thây kô pơ tho pran jăng grăng hơ kâu, hiôk chơt, đe mon đei 1 pơ yan pơ dơh he ‘lơ̆ng, chơt hơ iă, đei yua ‘lơ̆ng. Ƀlep ƀơ̆t năr apŭng plĕnh teh kơ đe hơ ioh 1/6, Lêh tơ lĕch jang Khei bơ̆ jang yua kơ hơ ioh păng pơ tơm blŭng a pơ yan he sơ năm 2022, Thủ tướng teh đak Phạm Minh Chính păng khŭl kơ dră chĕp kơ̆l dôm anih tơm, anih jang păng Kơ dră Anih vei lăng kon pơ lei kơ pơ lei tơm Hà Nội hlôi năm tơ mang tơ̆ dôm bơ ngai hơ ioh jĭ tŏk bŏk hơ met tơ̆ Hnam pơ gang hơ met jĭ Ung thư păng dôm hơ ioh jĭ tŏk bŏk hơ met jơ hngơ̆m pran đơ̆ng rŏng jĭ COVID-19 tơ̆ Hnam pơ gang hơ met jĭ hơ ioh Trung ương.

Thuem: Tơ blơ̆