Gơ măng brei (6/11), tơ̆ Hà Nội, Thủ tướng Phạm Minh Chính vang truh pơm lêh jang kiơ̆ Năr Khôi luơ̆t teh đak Cộng hoà xã hội chủ nghĩa Việt Nam (9/11) sơ năm 2022. Pơ ma tơ̆ lêh mít tinh Thủ tướng Phạm Minh Chính ‘meh vă, rim ‘nu bơ̆n hăm dôm tơ drong jang hơ dăh, ‘lơ̆ng, vang hơ dai păr ang jơ hngơ̆m đon jang kiơ̆ tơ păt khôi luơ̆t, tơ gop hơ nhăk Khôi luơ̆t tơm teh đak păng khôi luơ̆t tơ pă mơ̆t lơ̆m đon hlôh vao păng bơ̆ jang đơ̆ng rim kon pơ lei, anih jang mơ dro sa, đơ̆ng anih jang, khŭl jang păng đơ̆ng đĭ đăng tơ pôl. Jơ hngơ̆m đon ‘noh athei jang tơ drong hơ găt ‘lơ̆ng pơm kiơ̆ păng joh ayŏ lơ̆m tơ pôl.

Tơ drong pơ jing - roi tơ băt - jang kiơ̆ - dăr hơ len khôi luơ̆t đei bơ̆ jang kiơ̆ ‘lơ̆ng gô tơ plih dôm tơ drong kăp gĭt joh ayŏ ‘noh jing tơ drong gĭt kăl kơ teh đak. Tơ̆ hơ năp kơnh, Thủ tướng athei, hơ nơ̆ng vei kơ jăp, hơ tŏk ‘lơ̆ng đon hlôh vao, jang kiơ̆ đei yua tơ drong Tơ chơ̆t Hop akŏm bơ ngai tang măt lơ̆m teh đak ‘măng mă XIII kơ Đảng; tơ tĕnh tơ lĕch jang kiơ̆ tơ drong Tơ chơ̆t Trung ương 6 jăl XIII găh “Hơ nơ̆ng pơ jing jang pơ keh teh đak chĕp kơ̆l pơ gơ̆r kiơ̆ khôi luơ̆t XHCN Việt Nam lơ̆m jăl jang ‘nao” đơ̆ng rŏng kơ đei kơ dră gơh kĭ tơ lĕch ăn.