VOV4.Bahnar - Kơ sơ̆ ‘năr 13/10, Thủ tướng teh đak Phạm Minh Chính vang truh pơm lêh tơ ƀôh muh măt Kênh Tivi teh đak tơ ring pơ mơ̆t pơ băh - VTV Cần Thơ. Tơ drong pơ jing kênh ti vi teh đak VTV Cần Thơyak truh tơ ring pơ mơ̆t pơ băh hăm tơ drong tơm hơ tŏk loi dơ̆ng tơ drong jang kơ tơ̆ng ang, tơ roi tơ băt, jang kiơ̆ hơ năp jang chĭnh trĭ đơ̆ng Anih Radio pơ dăh ti vi Việt Nam tơ̆ tơ ring ‘nâu; pơm gơng tơ ƀưh đei yua đơ̆ng Khŭl kơ dră teh đak hăm rim kơ dră tơ ring păng kon pơ lei tơ̆ tơ ring vă păr ang, tơ ƀôh tơ drong hơ iă, pơm tơ drong ‘lơ̆ng tơ gop pơ jing tơ pôl ‘lơ̆ng hơ iă.

Thủ tướng Teh đak Phạm Minh Chính tơ̆ lêh tơ ƀôh muh măt Kênh Ti vi Teh đak VTV Cần Thơ

Pơ ma tơ̆ jơ pơm lêh Thủ tướng lui ngeh akhan, hăm trong lăng hơ iă, tơ drong hơ drin, jang ‘lơ̆ng păng tơ drong mơ̆t jang kơ tang đơ̆ng đĭ đăng kang ƀô̆, bơ ngai jang kơ Anih radio pơ dăh ti vi Việt Nam, tơ drong tơ gŭm đơ̆ng rim kơ dră, rim anih jang, rim tơ ring păng kon pơ lei, kênh VTV Cần Thơ gô đei tơ drong hơ tŏk tơ iung tơ tĕnh păng kơ jăp; đei pơih hơ yuh tôm, ‘lơ̆ng tơ̆ tơ ring tơ măn đak krong Cửu Long păng lơ̆m teh đak, hơ nơ̆ng jang đang hơ gei hloh hơ năp jang chĭnh trĭ đei Đảng, Teh đak, kon pơ lei pơ jao ăn.

VOV/Thuem tơ blơ̆