VOV4.Bahnar - Pơ gê 9/8, Thủ tướng Phạm Minh Chính, Kơ dră Anih jang kơ tĕh đak găh tơ plih kơ sô̆ pơ gơ̆r Hop akŏm trư̆k tuyê̆n lơ̆m tĕh đak pơ tôch 06 khei tơ lĕch tơ drong jang atŏk tơ iung tơ drong iŏk yoa kơ sô̆ chih răk găh kon pơ lei oei xa, kơ sô̆ hơ năn kon pơ lei păng trong tơ băt hăm điên tư pơ vih ăn tơ drong tơ plih kơ sô̆ kơ tĕh đak đơ̆ng 2022-2025, trong jang truh sơ năm 2030 (Tơ drong jang 06).

Jơ hop akŏm tơ̆ Anih pơih pơ dăh Hà Nội păng trư̆k tuyê̆n

Hop akŏm đei pơih pơ dăh đơ̆ng Anih jang kơ Khul kơ dră tĕh đak truh hăm dôm anih pơih pơ dăh tơ̆ dôm anih tơm, anih jang kơ pal, dêh char, plt găh Trung ương; dôm apŭng, thĭ xăh; phương, xăh lơ̆m tĕh đak; hăm hlŏh 10.000 anih pơih pơ dăh đơ̆ng xăh truh tơ̆ Trung ương păng hlŏh 130.700 ‘nu bơ ngai tang măt vang akŏm.

Pơ ma lơ̆m hop akŏm Thủ tướng Phạm Minh Chính akhan, ‘nâu jĭ 1 tơ drong jang mă Khul kơ dră tĕh đak akŏm jơ hngâm pơ gơ̆r jang tôch ai, mă loi ‘nŏh akŏm jơ hngâm bơ̆ jang tơ drong jang 06, hăm 7 tơ drong pơ gơ̆r jang, 5 grŭp jang, trong vă jang tôch rơ đăh. Thủ tướng athei dôm bơ ngai tang măt pơ ma nuh, tơ blang, roi tơ băt dôm tơ drong jang rơ gei, hơ iă, ƀai hŏk kăp gĭt đơ̆ng dôm anih jang, tơ ring kơ dih; tơ lĕch dôm trong jang tơm tơ̆ hơ năp kơnh vă bơ̆ jang tơ drong ‘nâu đei yoa ‘lơ̆ng.

Dơ̆ng: Tơ blơ̆