VOV4.Bahnar - Pơ gê 29/5, tơ drong đei gô chang hlŏh lơ̆m sơ năm đơ̆ng kon pơ lei jang chŭn mir Việt Nam hlôi đei pơ gơ̆r yoa Thủ tướng Phạm Minh Chính pơ gơ̆r. Hop akŏm Thủ tướng tĕh đak pơ ma nuh hăm kon pơ lei jang chŭn mir Việt Nam hăm hơ năn “Tơ gŭm ăn kon pơ lei jang chŭn mir, jang tŏk dơ̆ng, tưk tơ iung choh jang xa, tơ ring tơ rang kơ jăp ‘lơ̆ng” yoa Trung ương Khul kon pơ lei jang chŭn mir Việt Nam, jang hơ doi hăm Anih đảng, Dơ nŏ anih vei lăng kon pơ lei dêh char Sơn La pơ gơ̆r.

Hop akŏm Thủ tướng tĕh đak pơ ma nuh hăm kon pơ lei jang chŭn mir Việt Nam

Pơ ma pơ tôch hop akŏm, Thủ tướng Phạm Minh Chính pơ ma truh dôm tơ drong tih đei pơ ma nuh tơ̆ hop akŏm, vang tơ gop tơ ƀôh hơ dăh rim tơ drong tơ̆ yăn âu vă pơ jing trong jang tŏk pran kơ jăp ăn tơ drong choh jang xa, tơ ring tơ rang, pơm hơ tŏk tơ drong arih xa ăn kon pơ lei jang chŭn mir. Găh dôm trong jang, tơ drong vă jang tơm, Thủ tướng pơ ma hơ dăh 9 tơ drong, lơ̆m nŏh akhan: athei jang kiơ̆ mă ‘lơ̆ng, đei yoa dôm tơ drong tơ chơ̆t đơ̆ng Đảng; hơ tŏk hơ năp jang, anih dơ̆ng, đon rơ gei pơm tơm kơ dih đơ̆ng kon pơ lei jang chŭn mir, mă loi jĭ đon hlôh vao kiơ̆ trong “đon rơ gei ăn kon pơ lei jang chŭn mir” vă iŏk yoa kơ măy kơ mŏk lơ̆m tơ drong choh jang xa, tĕch mơ dro păng gơ̆h pơm pơ drŏng đơ̆ng tơ drong choh jang xa.

Dơ̆ng: Tơ blơ̆