VOV4.Bahnar - Pơ gê 30/8 tơ̆ Hnam hôp Thống nhất, plt Hồ Chí Minh, Thủ tướng Phạm Minh Chính tơ ƀâp, pôk pơ ư dôm khul lui khop đei tơ drong tơ gop lơ̆m tơ drong jang pơ jing păng vei lăng tĕh đak.

Thủ tướng Phạm Minh Chính tơ ƀâp, pôk pơ ư dôm khul lui khop

Việt Nam jĭ 1 tĕh đak đei lơ tơ drong lui khop, đei 43 khul găh 16 tơ drong lui khop đei tĕh đak chih tơ băt păng ƀơk ăn hla ar asong pơ gơ̆r hơ kŭm, krao khan; hăm hlŏh 26,5 triu ‘nu bơ ngai kiơ̆ lui, iŏk đei 27% kơ sô̆ kon pơ lei lơ̆m tĕh đak. Tơ̆ Hop akŏm lơ bơ ngai tang măt ‘nŏh jĭ đe ƀok pơ tho lui khop pơ ma tơ lĕch lơ nơ̆r tôch tơ găl, tơ năp ‘lơ̆ng, hăm ƀĕnh jơ hngâm đon ‘mĕh tơ iung pơ jing vă tơ lĕch jang đei yoa hlŏh dơ̆ng trong jang, tơ drong tơ gŭm, khôi luơ̆t găh tơ drong lui khop đơ̆ng Đảng, tĕh đak bơ̆n tơ̆ hơ năp kơnh.

Pơ ma lơ̆m hop akŏm, Thủ tướng Phạm Minh Chính pơ ma hơ dăh Đảng, tĕh đak bơ̆n hơ nơ̆ng chĕp vei kơ jăp, ưh đei tơ plih găh trong jang ƀơm truh tơ drong lui khop, năng kăl păng pơm ‘lơ̆ng ăn tơ drong ‘mĕh kiơ̆ lui khop mơ̆ng kơ vă đơ̆ng kon pơ lei. Tơ̆ hơ năp kơnh, Thủ tướng athei: kơ dră chĕp kơ̆l dôm khul lui khop hơ nơ̆ng krao hơ vơn đe ƀok pơ tho lui khop, bơ ngai kiơ̆ lui khop pơm kiơ̆ ‘lơ̆ng trong jang đơ̆ng Đảng, tơ drong tơ gŭm, khôi luơ̆t đơ̆ng tĕh đak. Vei kơ jăp đon lui, yak hơ doi hăm hơ drĕch hơ drung. Hơ met kơ jăp tơ drong tơ guăt đĭ đăng hơ drĕch hơ drung, tơ guăt đĭ đăng tơ drong lui khop.

Dơ̆ng: Tơ blơ̆