VOV4.Bahnar - Pơgê năr 10/8, Thủ tướng Phạm Minh Chính, Kơdră Dơnŏ anih chĕp pơgơ̆r Tĕh đak rim tơdrong jang, tơdrong vă jang kăl tĕh đak, tơdrong jang gĭt kăl Hơnĭh jang vei lăng trong gre nơnăm (Dơnŏ anĭh chĕp pơgơ̆r) pơm tơm Hop akŏm trư̆k tuyên.

Rup hop akŏm

Hop akŏm đei pơgơ̆r hloi kơtă hăm trư̆k tuyên ƀar păh hơnĭh pơm pơgơ̆r tơ̆ Dơnŏ anĭh bơ̆ jang Tĕh đak hăm hơnĭh pơdăh vang hop akŏm Dơnŏ anĭh vei lăng kon pơlei 33 dêh char, pơlei tơm găh Trung ương đei rim tơdrong vă jang, tơdrong jang kăl. Tơ̆ Hop akŏm mă blŭng Dơnŏ anĭh chĕp pơgơ̆r, Thủ tướng Phạm Minh Chính pơma hơdăh, kăl tơlĕch jang kơtang hlŏh dơ̆ng 3 trong jang tơm, lơ̆m au atŏk kơtang trong nơnăm, yak trŭh tơring tơrang, yak truh dĭh băl rim dêh char. Hrei au, găh kon jên tơmơ̆t jang hlôi păng tŏk bŏk tơlĕch ăn kơ yuơ hlôi tơjur ƀiơ̆ tơdrong vă tơmơ̆t jên jang đơ̆ng pơ đĭ lơ̆m tĕh đak jur pă 5.000 tơdrong vă jang, akŏm lơ̆m rim tơdrong vă jang tĭh păng hlôi hơvơn kon jên jang Trung ương, tơring, chă hơvơn đơ̆ng rim tơdrong jang hơmet ming păng atŏk tơ iung mŭk drăm-tơpôl, đơ̆ng kon jên pơkom. Thủ tướng tơbăt, vă pơjing jơhngơ̆m pran, kăl pơjing Dơnŏ anĭh chĕp pơgơ̆r Tĕh đak vă pơrô̆ athei rim tơdrong jang ‘moi kiơ̆ hơnăp jang, gơ̆h jang kơ Khŭl kơdră tĕh đak, rim hơnĭh tơm, hơnĭh bơ̆ jang, tơring tơrang vă tơgoăt dĭh băl tơdrong jang trŏ ƀlep, pơrô̆ pơrôp, tơlĕch jang xek tơlang keh đang dôm tơdrong tơhlăk tơhlĭn.

Tơblơ̆ nơ̆r: Amazưt