VOV4.Bahnar - Drung kơsơ̆ brei, năr 19/9 tơ̆ Hơnĭh bơ̆ jang Khŭl kơdră Tĕh đak, Hop akŏm trư̆k tuyên kơ Thủ tướng Tĕh đak hăm rim Kơdră chĕp pơgơ̆r Dơnŏ anĭh tang măt Việt Nam tơ̆ tĕh đak đe găh atŏk kơtang bơ̆ jang Tơbôl mŭk hlôi đei pơgơ̆r kơtă păng trư̆k tuyên.

Rup hop akŏm

‘Nau hop akŏm mă blŭng Thủ tướng Tĕh đak pơrô̆ găh bơ̆ jang tơbôl mŭk drăm. Hop akŏm gô pơma dơnŭh, lăng hơlen tơdrong rơvơn păng tơdrong long lơ̆m khei năr hrei au, mă kăl ‘nŏh dôm tơdrong rơvơn Việt Nam kăl pơgĕnh, tơlĕch jang mă kăl ‘nŏh tĕch mơdro tơ̆ tĕh đak đe, tơmơt jên jang, tơmang pơ hiơ̆ vă hơvơn kơtang rim khŭl tơgŭm ăn hơmet pơ ‘lơ̆ng păng atŏk tơ iung mŭk drăm tơpôl; đơ̆ng nŏh tơlĕch rim trong jang vă atŏk kơtang bơ̆ jang tơbôl mŭk drăm tơ̆ pơ đĭ lơ̆m tĕh đak păng tĕh đak đe vă yak hlŏh tơnap tap ƀơ̆t măt păng pơjing hơyak pran vă jang kiơ̆ rim trong tơlĕch jang atŏk tơ iung mŭk drăm-tơpôl. Iung pơma tơ̆ hop akŏm, Thủ tướng tĕh đak Phạm Minh Chính  athei rim Kơdră Tang măt tĕh đak, Kơdră chĕp pơgơ̆r rim Hơnĭh tơm, hơnĭh bơ̆ jang, Hơnĭh mơdro sa iung jang đĭ ai, tơlĕch rim trong jang atŏk kơtang tơtom rim tơdrong jang Tơbôl mŭk drăm tơ̆ lơ̆m tĕh đak păng tơ̆ tĕh đak đe; pơma tơbăt jơhngơ̆m đon hơpơi ‘mĕh vă; tơlĕch trong jang, trong bơ̆ jang tơgŭm djru, khŭl jang vă atŏk kơtang iŏk đei jơnei bơ̆ jang tơbôl mŭk drăm.

Tơblơ̆ nơ̆r: Amazưt