VOV4.Bahnar - Pơgê năr 21/3, tơ̆ Hơnĭh bơ jang Kơdră chĕp pơgơ̆r Tĕh đak, Thủ tướng Tĕh đak Phạm Minh Chính pơm tơm Pơm lêh sơng Thủ tướng Malaysia Dato’ Sri Ismail Sabri bin Yaakob năm tơmang Việt Nam.

‘Măng iung năm tơmang Việt Nam đơ̆ng Thủ tướng Malaysia đei pơgơ̆r lơ̆m khei ‘năr tơgoăt tơgoăl joăt joe păng jang hơdoi gĭt kăl Việt Nam-Malaysia tŏk bŏk atŏk tơ iung ‘lơ̆ng hơ iă. Ƀar tĕh đak tŏk bŏk lăng trŭh tơbăt 50 sơnăm năr pơjing tơbôl (1973-2023). Lăp đơ̆ng rŏng pơm lêh sơng, Thủ tướng Phạm Minh Chính hăm Thủ tướng Malaysia hlôi pơma dơnŭh păng vang năm lăng kĭ pơkăp hla bơar kăl kơ ƀar tĕh đak. ‘Măng năm tơmang vă atŏk hlŏh dơ̆ng tơgoăt tơgoăl, atŏk kơtang jơhngơ̆m pran kơ ƀar tĕh đak lơ̆m jang hơdoi đơ̆ng rŏng jĭ hơbuh Covid-19. ‘Nau jei jing rơvơn vă ƀar păh tơchă rim tơdrong jang hle vă jang hơdoi; pơma dơnŭh găh tơdrong lơ̆m tơring păng apŭng plĕnh tĕh mă ƀar păh lăng trŭh; pơtrŭt kơtang bơ̆ jang mơdro sa, tơmơ̆t jên jang ƀar tĕh đak.

Tơblơ̆ nơ̆r: Amazưt