VOV4.Bhanar - Iung pơma tơ̆ hop akŏm kơ Dơnŏ anĭh chĕp pơgơ̆r găh bơ̆ jang tang găn jĭ hơbŭh Covid-19, Thủ tướng Tĕh đak Phạm Minh Chính athei rim hơnĭh jang păng rim tơring dăr lăng kơ jăp dôm tơdrong jĭ jăn lơ̆m tĕh đak păng lơ̆m apŭng plĕnh tĕh, dăr lăng hơlen nơ̆r tơbăt đơ̆ng rim hơnĭh bơ̆ jang apŭng plĕnh tĕh, rim bơngai khoa hŏk; tơtom ƀô̆h, iung tơ jră tang găn rim tơdrong hơlen băt, nhen sơmach jĭ lơn hăm vaccine dăh mă đei sơmach hle, tơdrong jĭ hơmơt đei roi kơtang dơ̆ng.

Thủ tướng pơm tơm Hop akŏm Dơnŏ anĭh chĕp pơgơ̆r tang găn jĭ

Atŏk kơtang hlŏh dơ̆ng tơdrong ƀet vaccine, mă kăl ‘nŏh hăm rim bơngai hơmơt tơpŏh kơtang nhen bơngai kră, bơngai đei jĭ jăn, đe hơ iŏh, kŏng nhân jang tơ̆ rim hnam kmăi pơm tơlĕch tơmam drăm, tơring kơdrơ̆m ...; akŏm dăr lăng kơ jăp rim tơdrong hơmơt tơpŏh, rim bơngai jĭ ăl păng hơmơt pơm ăn trŭh lôch răm. Thủ tướng athei jang keh đang ƀet vaccine ăn hơ iŏh đơ̆ng 12 sơnăm trŭh 18 sơnăm lơ̆m khei 4 au; hăm rim đe hơ iŏh đơ̆ng 12 sơnăm kăl iung jang kơtang hlŏh dơ̆ng ƀet keh đang lơ̆m jăl 2 sơnăm 2022.

Tơblơ̆ nơ̆r: Amazưt