Kơmăng 23/11, Thủ tướng Phạm Minh Chính păng Hơkăn sư kŭm hăm khŭl tang măt gĭt kăl kơ Việt Nam lĕch đơ̆ng Cộng hòa Nam Phi, pơtôch tơdrong jang vang truh Hop akŏm tih G20 sơnăm 2025 păng lơ tơdrong jang 2 pang. VOV.Bahnar - Hăm hơnăp jang Tơmoi hơvơn đơ̆ng Kơdră G20, Thủ tướng vang akŏm dôm tơdrong jang lơ̆m jơnăr Hop akŏm tih G20 kŭm hăm kơdră chĕp kơ̆l dôm teh đak jang lơ̆m khŭl, teh đak tơmoi hơvơn păng anih jang apŭng plĕnh teh.

Tơ̆ 2 ‘măng pơma dơnuh găh hơtŏk tơiung kơjăp, tôm păng tơgop đơ̆ng G20 ăn 1 apŭng plĕnh teh hơdrin kơdih, Thủ tướng athei G20 pơtrŭt jang hơdai apŭng plĕnh teh pơyom khôi luơ̆t, hơmet pơ ‘lơ̆ng tơdrong tơblăh tơblŭng, pơvei tĕch mơdro lơ pang hăm WTO pơm tơm, vei sơđơ̆ng tơdrong jang jên hu rơđăh, hơtŏ băl; hơdai hăm pơm tơdrong jang hơtŏk tơiung lơ̆m tơplih kơsô̆, tơplih rơgoh. Ƀlep ƀơ̆t ‘măng âu, Việt Nam păng Nam Phi pơma hơdăh hơtŏk tơdrong pơvei jang hơdai gĭt kăl, tŭn pran jang hơdai mŭk drăm, tĕch mơdro, tơmơ̆t jên jang, yak truh tơdrong hơgăt hơnhăk jên tĕch mơdro 2 pang đei  4-5 ti USD lơ̆m 2-3 sơnăm truh.