Pơgê 20/10, lơ̆m jơ năr pơgơ̆r ‘Măng hop akŏm mă 10, Quốc hội jăl XV, Thủ tướng Phạm Minh Chính hlôi roi tơbăt pơtôch bơ̆jang kiơ̆ Trong tơlĕch jang hơtŏk tơiung mŭk drăm - tơpôl sơnăm 2025, jăl jang 2021 – 2025 păng tơchĕng hơdrol tơlĕch trong jang sơnăm 2026. Thủ tướng pơma hơdăh, jăl jang âu ki ‘noh jĭ tơdrong jang đơ̆ng đon hơdrin tôch bơneh, jơhngơ̆m nuih kơjăp, pơcheh gơh hơgei păng hơpơi ‘meh yak tŏk yua kơ Teh đak, yua kơ Kon pơlei.

Việt Nam hlôi vei lăng jơnei jĭ hơbuh COVID-19, hrôih pơih ‘măng tơiung ming mŭk drăm, đei tơpôl apŭng plĕnh chih iŏk ‘lơ̆ng. Lơ̆m khei ‘năr pơmat tat jơ̆p plei teh, mŭk drăm Việt Nam oei pơvei tŏk lơ, găh grŭp dơ̆ng hơdrol apŭng plĕnh teh. Tơchĕng hơdrol GDP sơnăm 2025 tŏk hloh 8%; jô̆ păh lăp jăl jang 2021 – 2025 đei 6,3%. Tơdrong mŭk drăm tŏk đơ̆ng 346 ti USD sơnăm 2020 tŏk 510 ti USD sơnăm 2025, tŏk 5 kơnao, dơ̆ng mă 32 apŭng plĕnh teh; GDP jô̆ păh lăp kơ̆l bơngai đei dang 5.000 USD, hloh 1,4 ‘măng sơnăm 2020.