VOV4.Bahnar - Kơ sơ̆ ‘năr 21/3, Thủ tướng Phạm Minh Chính sơng yă Manuela V. Ferro, Phŏ kơ dră chĕp kơ̆l Anih mong jên apŭng plenh tĕh (WB) vei lăng tơ ring Đông Á păng Thái Bình Dương. Thủ tướng pơ ma hơ dăh, Khul kơ dră tĕh đak Việt Nam ling lang năng WB jĭ bơ ngai boăl ‘lơ̆ng, anih jang hơ doi gĭt kăl vă jang tŏk. Việt Nam vă hơ nơ̆ng pơ ma nuh hăm WB păng Grŭp 6 anih mong jên atŏk tơ iung găh dôm trong jang vă hơ met pơ ‘lơ̆ng trong pơ gơ̆r, jăh hơ met pơ ‘lơ̆ng dôm tơ drong tơ hlăk tăk, pơm hiôk hian ăn tơ drong pơm hla ar vă gơ̆h tơ lĕch dôm tơ drong jang đei yoa ‘lơ̆ng, trŏ khei ‘năr hơ găt.

Thủ tướng tơ chĕng ‘lơ̆ng păng athei WB hơ nơ̆ng tơ gŭm, jang hơ doi đei yoa hăm Việt Nam găh jên jang, kơ măy kơ mŏk, trong pơ gơ̆r jang, khul bơ ngai jang, vei lăng vă tơ jră hăm tŏ ‘mi kial tơ plih, bơ̆ jang dôm nơ̆r pơ kăp tơ̆ Hop akŏm COP26 kiơ̆ trong đĭ đăng kon pơ lei vang jang, jơ̆p plei tĕh vang jang, pơm ‘lơ̆ng hơ tŏ hơ nơ̆ng, trŏ ƀlep hăm dôm tĕh đak oei vă tŏk pơ drŏng.

Dơ̆ng: Tơ blơ̆