VOV4.Bahnar - Kơsơ̆ năr 05/9 tơ̆ Hơnĭh bơ̆ jang Khŭl kơdră Tĕh đak, Thủ tướng Tĕh đak Phạm Minh Chính hlôi sơng pơma dơnŭh hăm ƀok Bill Winters, Kơdră chĕp pơgơ̆r Dơnŏ anĭh mong jên Standard Chartered (Tĕh đak Anh) tŏk bŏk năm ngôi, bơ̆ jang tơ̆ Việt Nam. Thủ tướng Phạm Minh Chính pơma tơbăt dôm tơdrong lơ̆m apŭng plĕnh tĕh đei lơ tơdrong mơmat tat, mŭk drăm-tơpôl Việt Nam khei năr au ki oei jơnei hơ iă.

Thủ tướng Tĕh đak sơng pơma dơnĭh hăm Kơdră chĕp pơgơ̆r Hơnĭh mong jên Standard Chartered

Thủ tướng tơbăt jơhngơ̆m hôn bơnê rim hơnĭh mơdro sa, bơngai tơmơ̆t jên jang tĕh đak đe, lơ̆m au đei Dơnŏ anĭh mong jên Standard Chartered, hlôi yak hơdoi, tơgum djru Việt Nam lơ̆m tang găn jĭ jăn păng atŏk kơtang hơmet pơ ‘lơ̆ng, atŏk tơ iung mŭk drăm-tơpôl. Thủ tướng Tĕh đak tơbăt trong tơlĕch jang hơlâu kơ Việt Nam găh hơvơn kon jên tơmơ̆t jang ‘lơ̆ng vă pơjing đei jơhngơ̆m pran atŏk tơ iung kơ jăp, mă kăl atŏk tơ iung rơgŏh ‘lơ̆ng, jang kiơ̆ kmăi kmŏk kơsô̆, tơplĭh ŭnh hơyŭh kiơ̆ trong kơ jăp ‘lơ̆ng păng atŏk kơtang jang hơdoi hăm rim khŭl pơdrŏng, rim trong bơ̆ jang jên hu apŭng plĕnh tĕh păng rim Grŭp jang jên hu lơ̆m plei tĕh, lơ̆m ai đei Hơnĭh mong jên Standard Chartered.

Tơblơ̆ nơ̆r: Amazưt