VOV4.Bahnar - Pơgê năr 25/7, tơ̆ Hà Nội, Quân ủy Trung ương, Dơnŏ anĭh tơm Ƀô̆ đô̆i vei lăng sơlam tĕh đak pơgơ̆r Hop akŏm khŭl ƀô̆ đô̆i 6 khei blŭng sơnăm 2022. Ƀok Phạm Minh Chính, Thủ tướng Tĕh đak, Kơdră jang lơ̆m Khŭl Kơdră chĕp pơgơ̆r Quân ủy Trung ương vang năm păng pơrô̆ tơ̆ Hop akŏm.

Tơdrau khei blŭng sơnăm 2022, Quân ủy Trung ương, Dơnŏ anĭh tơm Ƀô̆ đô̆i vei lăng sơlam Tĕh đak pơrô̆ athei pơ đĭ khul ƀô̆ đô̆i tơgoăt tơgoăl mĭnh nơ̆r ƀơ̆r đon, hơdrin đĭ ai, jang keh đang rim tơdrong jang đei pơjao, lơ tơdrong jang bơ̆ jang keh đang ‘lơ̆ng. Găh tơdrong jang tơm lơ̆m tơdrau khei hơtuch sơnăm, pơ đĭ khŭl iung jang kơtang hlŏh dơ̆ng, băt hơdăh tơtom dôm tơdrong au to, tơroi tơbăt tơtom ăn kơ Đảng, Tĕh đak, đei trong iung jang xek tơlang ‘lơ̆ng rim tơdrong. Hơnơ̆ng pơchŏh trong ‘lơ̆ng rim tơdrong vă jang, tơdrong pơjing khôi luơ̆t găh khul lĭnh, vei lăng sơlam tĕh đak; jang kiơ̆ ‘lơ̆ng trong bơ̆ jang hơtŭm vei lăng sơđơ̆ng tĕh đak hăm atŏk tơ iung mŭk drăm tơpôl; Tơlĕch jang kiơ̆ kơ jăp bơ̆ jang vei lăng sơlam tĕh đak tơ̆ hơnĭh tơm, tơring tơrang păng pơtho tơbăt vei lăng sơđơ̆ng tĕh đak ăn rim răih bơngai; Vei kơ jăp kơchăng kơtang, vei lăng gei kơ jăp rơvơ̆ng plĕnh, tơring đak dơsĭ, sơlam tĕh đak, vei kơ jăp iăp kơtang tơdrong pơm tơm kơ dĭh groi tĕh, rim tơdrong bơ̆ jang atŏk tơ iung mŭk drăm đak dơsĭ.

Tơblơ̆ nơ̆r: Amazưt