VOV4.Bahnar - Sơng iŏk nơ̆r krao hơvơn đơ̆ng Kơdră chĕp pơgơ̆r Kơpal păng khŭl kơdră chĕp pơgơ̆r Liên ƀang Nga, Thủ tướng Tĕh đak vang năm Hop akŏm mŭk drăm Tơring Hơlĕch pơgơ̆r tơ̆ Vladivostok, Liên ƀang Nga ‘moi kiơ̆ trong pơma tơgop nơ̆r lơ̆m video.

Thủ tướng Tĕh đak vang năm Hop akŏm mŭk drăm Tơring Hơlĕch kiơ̆ trong pơma tơgop nơ̆r lơ̆m video

Lơ̆m nơ̆r pơma, Thủ tướng Tĕh đak pơma hơdăh, Hop akŏm tôch gĭt kăl vă atŏk kơtang jang hơdoi apŭng plĕnh tĕh, tơgop vei kơ jăp sơđơ̆ng, jang hơdoi păng atŏk tơ iung tơ̆ tơring Châu Á – Thái Bình Dương păng apŭng plĕnh tĕh. Thủ tướng Tĕh đak sơkơ̆t hơdăh, Việt Nam tơlĕch jang tơ iung pơjing jang mŭk drăm kơdĭh păng hơdrin vang mơ̆t hơdoi lơ̆m apŭng plĕnh tĕh kơtang hlŏh, ‘lơ̆ng hlŏh. Găh tơgoăt tơgoăl jang mŭk drăm ƀar păh Việt Nam - Nga, Thủ tướng Tĕh đak pơma hơdăh: Hơnơ̆ng lăng kơ jăp tơgoăt tơgoăl jang hơdoi gĭt kăl tôm tong hăm Liên ƀang Nga, hôn bơnê kơtang tơdrong jang hơdoi mŭk drăm ƀar păh tĕh đak lơ̆m sơnăm au ki, mă kăl lơ̆m rim tơdrong jang hơyŭh, kmăi kmŏk păng mĭnh ƀar tơdrong jang anai.  Nhôn ‘mĕh vă hơnơ̆ng pơtrŭt kơtang jang hơdoi hăm rim hơnĭh jang mă ƀar păh jang gơ̆h, pơgĕnh kơtang rim tơdrong rơvơn đơ̆ng tơlĕch jang kiơ̆ Tơdrong tơchơ̆t Mơdro sa hiôk hian ƀar păh Việt Nam păng Jơnŭm jang mŭk drăm Á-Âu. Thủ tướng Tĕh đak sơkơ̆t hơdăh, Việt Nam hôn bơnê kơtang tơdrong tơgoăt jang mŭk drăm Nga, mă kăl tơring Viễn Đông, hăm rim tĕh đak Châu Á - Thái Bình Dương, pơtrŭt kơtang jang Hơdoi gĭt kăl ASEAN - Nga.

Tơblơ̆ nơ̆r: Amazưt