Hơnĭh tơm R&D ‘nao kơ Samsung tơ̆ Hà Nội đei ming man đơ̆ng khei 3 sơnăm 2020, lơ̆m hơgăt teh să hlŏh 11.600 m2, ‘nŏh đei hnam kơjung 16 tăl tơ̆ kơpal păng 3 tăl tơ̆ hơla teh, hăm kon jên ming man 220 triu dolar. Hơnĭh tơm R&D ‘nao kơ Samsung tơ̆ Hà Nội ‘nŏh Hơnih tơm R&D tĭh hlŏh Đông Nam Á păng 1 lơ̆m 18 hơnĭh tơm R&D kơ Samsung lơ̆m apŭng plĕnh teh. Tơ̆ Hơnĭh tơm R&D Hà Nội, Samsung gô vă iung jang chă tơchĕng păng pơm tơlĕch kmăi tĭnh kơƀang, kmăi kmŏk kmăi tinh, tơmơ̆t đei 3.000 ‘nu bơngai jang. Iung pơma tơ̆ pơgơ̆r au, Thủ tướng teh đak Phạm Minh Chính pơma hơdăh, Hơnĭh tơm R&D Samsung iung jang ‘nŏh hơyak blŭng vă Samsung iung jang tôm rim trong tơlĕch jang atŏk tơ iung; jing tơdrong tơƀô̆h hơdăh ăn dôm trong bơ̆ jang trŏ ƀlep đơ̆ng Đảng, Teh đak Việt Nam lơ̆m tơdrong rao hơvơn tơmơ̆t jên jang lơ̆m tơdrong jang khoa hŏk kmăi kmŏk, tơplĭh ‘nao trong tơchăr, atŏk tơ iung kmăi kmŏk hơgei. Thủ tướng Phạm Minh Chính athei rim hơnih bơ̆ jang Trung ương păng kơdră tơring hơnơ̆ng tơgŭm djru păng pơjing rơvơn ăn rim teh đak đe tơmơ̆t jên jang, lơ̆m au đei Grŭp jang Samsung tơmơ̆t jên jang mơdro sa iŏk yua kơjăp păng đunh đai tơ̆ Việt Nam.

Lơ̆m pơgê ‘năr 23/12 mơ̆n, Thủ tướng Phạm Minh Chính hlôi sơng ƀok Lee Jae Yong, Kơdră chĕp kơ̆l grŭp jang Samsung. Tơ̆ ‘măng tơƀơ̆p, Thủ tướng lăng ‘lơ̆ng tơdrong hơdrin đơ̆ng Samsung lơ̆m tơdrong jang đang Anih jang R&D, bơnê dôm tơdrong vang tơgop đơ̆ng Samsung hăm Việt Nam hăm hơnăp jang ‘noh jĭ anih mơdro sa FDI tih hloh, tơƀôh đon mơnat hăm Samsung găh dôm tơdrong mơmat tat, lơ̆m khei ‘năr jĭ COVID-19, hmach kơ Samsung jơnei tôm tơdrong hloh dơ̆ng tơ̆ Việt Nam. Thủ tướng kŭm athei kŏng ti hơtŏk kơsô̆ tơmam lơ̆m teh đak, kơjă pơm tơlĕch lơ̆m teh đak tơ̆ Việt Nam, tơjur răt tơmơ̆t đơ̆ng teh đak đe. Kơdră chĕp kơ̆l Samsung pơma hơdăh gô hơdrin tơlĕch jang dôm tơdrong tơm mă Thủ tướng hlôi athei; tŭn pran pơtho pơhrăm, hơtŏk tơiung bơngai jang kĕ pơm lăp hăm hơnih bơ̆jang jơ̆p plĕnh teh păng jang hơdai hăm păih Việt Nam vă hơtŏk hloh dơ̆ng kơsô̆ tơmam lơ̆m teh đak pơđĭ hloi tơdrong jang kăl.