Pơ gê ‘năr 20/10, lăp đơ̆ng rŏng kơ ƀok Kơ dră Kuôi hô̆i Vương Đình Huệ pơ ma hơ dăh pơ gơ̆r ‘măng hop akŏm mă 4, Kuôk hô̆i jăl XV, Thủ tướng teh đak Phạm Minh Chính hlôi tơ roi tơ băt pơ tôch jang kiơ̆ trong tơ lĕch jang hơ tŏk tơ iung mŭk drăm - tơ pôl sơ năm 2022; tơ chĕng hơ drol trong tơ lĕch jang hơ tŏk tơ iung mŭk drăm - tơ pôl sơ năm 2023. Găh hơ năp jang, trong jang tơm dôm khei hơ tuch sơ năm 2022 Thủ tướng athei rim kơ dră, rim anih jang, rim tơ ring hơ nơ̆ng jang kiơ̆ hrơ̆ch 1 ‘măng, đei yua dôm hơ năp jang, trong jang tơ lĕch ăn lơ̆m rim tơ drong jang.

Thủ tướng Phạm Minh Chính tơ roi tơ băt tơ̆ hơ năp Kuôk hô̆i tơ̆ ‘măng hop akŏm mă 4

Kăl lăng tang găn jĭ COVID-19, ưh kơ lê̆ jĭ hơ drom jĭ; tơ tĕnh hơ met pơ ‘lơ̆ng tơ drong ưh kơ măh pơ gang, tơ mam kơ măy kơ mŏk pơ gang. Găh trong tơ lĕch jang hơ tŏk tơ iung mŭk drăm tơ pôl sơ năm 2023 thủ tướng pơ ma hơ dăh hơ nơ̆ng tơ gŭm hơ drol vei kơ jăp sơ đơ̆ng mŭk drăm, vei lăng hơ tŏk kơ jă lơ, pơ trŭt jang tŏk, vei sơ đơ̆ng dôm tơ drong hơ tŏ băl tih đơ̆ng mŭk drăm. Vei lăng đei yua dôm kơ loăi jĭ hơ buh. Tŭn pran hơ met ming dơ̆ng, hơ tŏk ‘lơ̆ng lơ̆m tơ doă dang ei, hơ drin kơ dih, pơm tơ ‘ngla kơ dih, kĕ tơ jră pŭ păng pơm lăp đơ̆ng mŭk drăm; hơ met ming, hơ tŏk tơ iung dôm tơ drong ‘lơ̆ng jang tŏk ‘nao.