Pơma dơnuh hăm kon pơlei tơ̆ ou, Thủ tướng tơbăt: Khul Việt Nam vang năm Hop akŏm joet joe rim kơdră dơnơm ‘măng mă 16 kơ Hop akŏm Mŭk drăm apŭng plĕnh teh tơ̆ Thiên Tân hăm hơnăp jang, “đei lơ tơdrong vă pơma, đei lơ tơdrong kăl hưch hanh hơmanh bơnê”, kiơ̆ đơ̆ng noh, sơkơ̆t hơdăh hơnih dơ̆ng, tơdrong lui yom kơ teh đak bơ̆n. Găh tơgoăt tơgoăl ƀar teh đak, Thủ tướng pơma hơdăh, Việt Nam păng Trung Quốc tơgoăt dih băl đơ̆ng rơbou sơnăm kơ ou, kơna, pơtrŭt tơgoăt tơgoăl hăm Trung Quốc jei jing tơdrong kăl hloh. ‘Nou jei jing trong rơih kơtang kơ yuơ Trung Quốc ‘noh mĭnh teh đak tih, teh đak tơjê̆, tơdrong jang mŭk drăm tih lơ̆m apŭng plĕnh teh. Thủ tướng athei Hơnih tang măt teh đak păng kon pơlei Việt Nam tơ̆ Trung Quốc kăl hơmet pơ ‘lơ̆ng tơgoăt tơgoăl ou roi năr roi atŏk tơ iung ‘lơ̆ng liĕm, tơgoăt tơgoăl kơjăp "mĭnh păh bôl boăl, mĭnh păh ‘nhŏng oh”. Hơpơi kon pơlei hơdrin vang tơgop tơ iung pơjing tơdrong tơgoăt tơgoăl dih băl “ling lang ‘lơ̆ng rŏ hơbŏ nhen hloh".