VOV4.Bahnar - Kơ sơ̆ 10/2, tơ̆ Hà Nội, Thủ tướng Phạm Minh Chính truh akŏm păng iung pơ ma nơ̆r pơ tho lơ̆m jơ pơm Lêh roi tơ băt Tơ drong jang jơ hngâm pran hŏk tro đơ̆ng 2021-2025 đei pơ gơ̆r trư̆k tuyê̆n đơ̆ng Hnam hôp apŭng plenh tĕh Hà Nội hăm 63 dêh char, plt păng tơ guăt hăm hlŏh 41.950 hnam trưng lơ̆m tĕh đak. Kŭm hăm tơ drong pơih dơ̆ng ‘măng hnam trưng ăn hŏk tro năm hŏk lơ̆m tĕh đak, ‘nâu jĭ tơ drong tôch gĭt kăl, tơ ƀôh hơ dăh đon pơ hnŏng đơ̆ng Đảng păng tĕh đak lơ̆m tơ drong pơm hơ tŏk tơ drong vei lăng, năng tông đe hơ iŏh, hŏk tro.

Tơ drong jang Jơ hngâm pran hŏk tro đơ̆ng 2021 - 2025 chih hơ dăh 5 grŭp jang tơm păng 7 grŭp jang vei lăng năng tông jơ hngâm pran ăn hơ iŏh, hŏk tro; pơ tâp pơ hrăm hơ kâu jăn păng tơ plŏng kơ dâu tơ̆ hnam hŏk; pơ gơ̆r sŏng xa tơ̆ hnam hŏk, vei lăng ‘lơ̆ng kơ chơ̆t bek; tơ mât yoa kơ măy kơ mŏk vei lăng, dăr hơ len, chih jô̆, roi tơ băt, pơ tho tơ ƀôh jơ hngâm pran ăn hŏk tro tơ̆ hnam trưng.

Pơ ma tơ̆ âu, Thủ tướng Phạm Minh Chính pơ jao tơ drong jang ăn dôm anih tơm, anih jang kơ pal, tơ ring tơ rang, atŭm hăm ‘nŏh krao hơ vơn tơ drong vang jang đơ̆ng rim khul grŭp, tơ lĕch jang hơ doi ‘lơ̆ng dôm tơ drong jang đei ƀơm truh vă hơ tŏk tơ drong vei lăng tôm tơ drong, ‘lơ̆ng hơ iă găh hơ kâu jăn păng jơ hngâm đon ăn hơ iŏh păng hŏk tro.

Dơ̆ng: Tơ blơ̆