Kiơ̆ nơ̆r tơroi, ƀât mă tơdrong pơtruh đak xăng đak dâu lơ̆m apŭng plenh teh oei tơƀâp pơmat tat, bơ̆ jang kiơ̆ nơ̆r pơtho đơ̆ng khul kơdră teh đak, dôm anih tơm, anih jang kơpal vang bơ̆ jang tôch pơneh, mă loi jĭ Anih tơm vei lăng jang kơmăy, tĕch mơdro vă vei lăng sơđơ̆ng ‘lơ̆ng yă tĕch đak xăng, đak dâu. Grŭp bơ̆ jang vei lăng sơđơ̆ng unh hơyuh hlôi tơlĕch trong vei sơđơ̆ng đak xăng, đak dâu lơ̆m khei 3, hơmet hiă trong jang ăn dôm khei đơ̆ng rŏng dơ̆ng.

Pơma tơ̆ jơ hôp, Thủ tướng Phạm Minh Chính pơma hơdăh đon pơhnŏng ưh gơ̆h lê̆ đei tơdrong ưh kơmăh đak xăng, đak dâu mă đei tơdrong kiơ. Thủ tướng hlôi chih kơthơ păng pơma điên thoăi hăm dôm kơdră chĕp kơ̆l đei ƀơm truh unh hơyuh; hơtŏk tơdrong jang tơbôl găh unh hơyuh ƀât oei đei tơdrong pơmat tat dang ei; dôm anih tơm, anih jang kơpal hlôi bơ̆ jang tôch ai kiơ̆ hơnăp jang kơdih, chă anih tĕch tơmam; atŭm hăm ‘nŏh tơlĕch hloi tơdrong hơgăt vă vei lăng yă đak xăng, đak dâu lăp ‘lơ̆ng. Thủ tướng athei chă dơ̆ng lơ anih tĕch đak dâu kơtuăl; tơlĕch trong pơma điên thoăi đơ̆ng Thủ tướng hăm dôm teh đak jang hơdoi nhen UAE, Kuwat,... vă gơ̆h đei lơ đak xăng, đak dâu, pơm lăp 30% đak xăng, đak dâu đei răt iŏk đơ̆ng teh đak đe.

Kơplăh dang ei, Thủ tướng krao hơvơn kon pơlei lê̆ gan pơngơ̆t, lê̆ lăng pơhơi. Đĭ đăng kon pơlei athei mât 1 ƀơ̆r đon, drơ̆ng pôm nơ̆r yak hlŏh pơmat tat, lê̆ kơ tơgar băl năm răt măn đak xăng, đak dâu kơnh jing đei tơdrong tơsŭl tơsăl, pơm ăn yă đak xăng, đak dâu roi tŏk... Thủ tướng pơjao ăn Anih tơm vei lăng jang kơmăy, tĕch mơdro akŏm jơhngâm tơchĕng hơlen tơlĕch trong 'măn răk đak dâu ăn teh đak; pơjing trong jang pơtruh măh mai unh hơyuh ăn teh đak; Anih tơm vei lăng jên hu tơlĕch jên đơ̆ng mong răk vă vei lăng sơđơ̆ng unh hơyuh teh đak.