Pơma pơtôch ‘măng hop akŏm, Thủ tướng Phạm Minh Chính lăng ‘lơ̆ng tơdrong mơ̆t jang hơdrin đơ̆ng rim anih tơm, anih jang, bơngai jang lơ̆m Grŭp bơ̆jang vei lăng sơđơ̆ng ŭnh hơyuh hlôi akŏm dôm trong jang vă sơđơ̆ng anih tĕch mơdro đak xăng đak dâu. Akhan tơdrong apŭng plĕnh teh đei ƀôh krê hơmơt, Thủ tướng pơma hơdăh tơdrong hơgăt ‘noh jĭ ưh kơ gơh lê̆ kơtĕch anih pơm tơlĕch tĕch mơdro đak xăng đak dâu, hơyuh soh; sơđơ̆ng chĭnh trĭ, sơđơ̆ng tơpôl, tang găn iŏk yua sa lơi tơdrong tơgŭm, ưh kơ pơm tơ sŭl tơ săl tơdrong, ƀơm ưh kơ ‘lơ̆ng truh vei lăng sơđơ̆ng tơpôl.

Thủ tướng Phạm Minh Chính akhan, ‘nâu jĭ tơdrong hiôk hơmet ming dơ̆ng pơm tơlĕch tĕch mơdro, pơtruh đak xăng đak dâu, pơm lăp hăm tơdrong ‘nao; athei hơtŏk loi dơ̆ng mong răk đak xăng đak dơâu, ŭnh hơyuh; pơm lơ anih tĕch mơdro, lơ hơnih pơtruh, ưh kơ pơ mơ̆ng lơ̆m ŭnh hơyuh lơ̆m 1 anih tĕch mơdro.