VOV4.Bahnar - Pơ gê ‘năr 10/3, tơ̆ Anih Hop akŏm tơm kơ teh đak, Anih tơm Hà Nội, Hop akŏm Bơ ngai tang măt drŏ kăn lơ̆m teh đak ‘măng mă XIII, jăl jang 2022 – 2027 hlôi pơ tơm pơ gơ̆r hăm 959 ‘nu vang akŏm, tang măt ăn rim răih drŏ kăn lơ̆m teh đak. Bơ ngai jang lơ̆m Anih tơm Chĭnh trĭ, Thủ tướng teh đak Phạm Minh Chính vang truh pơm lêh pơ gơ̆r blŭng a. Pơ ma tơ̆ Hop akŏm, Thủ tướng teh đak Phạm Minh Chính pơ ma hơ dăh, lơ̆m prăt jơ hnơr arih pơ jing teh đak păng vei teh đak, mă đơ̆ng tơ̆ jăl jang hơ yơ, khei ‘năr hơ yơ, hăm đon nuih, hơ drin, jơ hngơ̆m đon băt ‘mêm mơ nat, iơ̆m dim păng tơ drong hơ drin yak hloh, drŏ kăn Việt Nam hlôi yak hloh rim tơ drong pơ găn, mơ mat tat, đei dôm tơ drong vang tơ gop, plang jơ hngơ̆m tih tên, tơ gop pơ jing păng vei lăng kơ jăp teh đak Việt Nam. 

Vă jang kiơ̆ đei dôm tơ drong hơ găt hơ tŏk tơ iung teh đak tơ̆ hơ năp kơnh, Thủ tướng athei, kăl athei hơ tŏk jơ hngơ̆m pran tơ goăt pôm ƀơ̆r đon đĭ đăng hơ drĕch hơ drŭng, lơ̆m noh đei hơ năp jang tôch kơ gĭt kăl đơ̆ng drŏ kăn. Thủ tướng drơ̆ng lăp hăm trong jang, hơ năp jang jăl jang 2022 - 2027, dôm tơ drong hơ găt, dôm tơ drong hơ iă păng hơ năp jang tơm hlôi tơ lĕch ăn lơ̆m hla ar tơ roi tơ băt kơ Hop akŏm.

Thuem: Tơ blơ̆