Thủ tướng pơkă athei Đang ƀô̆ dêh char Thanh Hoá kăl băt hơdăh tơdrong, lăng kơjăp rim trong bơ̆ jang, tơdrong jang, trong chĕp pơgơ̆r đơ̆ng Đảng; kăl nuih mơng, lui kơjăp, ưh kơ pơhơi dôm tơdrong rơvơn, mă lei jei ưh kơ tơtok tơ̆ hơnăp tơdrong tơnap tap. Băt hlôh ƀôh hơdăh jơhngơ̆m đon “kon pơlei ‘noh tơm” lơ̆m rim tơdrong jang; kăl băt yom, mơ̆ng nơ̆r kon pơlei, kăl kơ yuơ kon pơlei, kăl sơđơ̆ng dôm tơdrong jang jei lăng truh hăm kon pơlei. Lơ̆m atŏk tơ iung mŭk drăm, kăl akŏm atŏk kơtang 4 tơring tơm ‘noh Nghi Sơn, Sầm Sơn, Bỉm Sơn păng Lam Sơn; tơ iung pơjing trong jang, trong tơgŭm djru pơm ăn tơring tơm ou jing hơnih tơm jang mŭk drăm kơ dêh char. Thủ tướng pơma hơdăh, tơdrong jang tơlĕch jang jăl 2 Hơnih hlŏng rơgoh đak đou Nghi Sơn, atŏk tơ iung Dơnŏk Nghi Sơn jing dơnŏk teh đak, hơnih tơm logistics tơring păng mĭnh lơ̆m dôm dơnŏk đak dơsĭ apŭng plĕnh teh tih hloh tơ̆ găh Tu, pơjing hơyak vă Thanh Hoá atŏk kơtang lơ̆m chăl ‘nao.