VOV4.Bahnar - Pơ gê ‘năr 04/8, tơ̆ Hà Nội, Anih mong jên teh đak Việt Nam pơ gơ̆r tơ drong jang tơ plih kơ sô̆ Anih mong jên. Thủ tướng teh đak Phạm Minh Chính vang truh păng iung pơ ma pơ gơ̆r lơ̆m tơ drong jang. Pơ ma lơ̆m tơ drong jang, Thủ tướng Phạm Minh Chính akhan, tơ plih kơ sô̆ ‘noh jĭ trong jang kăl păng jing ‘meh vă ‘lơ ‘lŏ hăm bơ̆n. Đảng, teh đak bơ̆n tôch kơ lăng kăl păng lăng ‘nâu jing 1 lơ̆m dôm hơ năp jang tơm tih hloh. Thủ tướng teh đak hlôi kĭ ăn tơ drong jang tơ plih kơ sô̆ kơ teh đak truh sơ năm 2025, trong vă jang truh sơ năm 2030.

Hăm tơ drong tơ plih kơ sô̆ 1 trong tôm tong, hăm tơ drong vang jang đơ̆ng kon pơ lei, anih jang mơ dro sa păng teh đak mă lei athei đei tơm; mă anih mong jên akŏm tôm dôm tơ drong kăl vă iung jang lơ̆m tơ drong jang ‘noh. Thủ tướng athei hơ tŏk loi dơ̆ng tơ drong jang tơ roi tơ băt găh tơ drong đei yua đơ̆ng tơ plih kơ sô̆ lơ̆m tơ drong jang anih mong jên truh kon pơ lei, anih jang mơ dro sa, tơ gŭm kon pơ lei, anih jang mơ dro sa hlôh hơ dăh găh tơ drong đei yua păng jơ nei.

Thuem: Tơ blơ̆