Kơsơ̆ năr 14/11, tơ̆ Hơnĭh bơ̆ jang Khŭl kơdră tĕh đak, lăp đơ̆ng rŏng pơma đam, Thủ tướng Tĕh đak Phạm Minh Chính hăm Thủ tướng New Zealand Jacinda Ardern hlôi vang năm Pơm lêh kĭ pơkăp hla bơar jang hơdoi ƀar păh rim hơnĭh tơm, hơnĭh bơ̆ jang ƀar tĕh đak păng tơƀơ̆p pơma dơnŭh hăm khŭl chĭh kơtơ̆ng ang.

Iung pơma tơ̆ hơnăp khŭl chĭh kơtơ̆ng ang, Thủ tướng Phạm Minh Chính sơkơ̆t hơdăh, Việt Nam ling lang lăng kơjăp jang hơdoi hăm New Zealand, mĭnh tĕh đak Jang hơdoi gĭt kăl hlŏh kơ Việt Nam tơ̆ tơring Pơbăh Thái Bình Dương, adoi jei jing mĭnh Tĕh đak jang hơdoi gĭt kăl hlŏh kơ ASEAN. Thủ tướng tơbăt: Tơ̆ ‘măng pơma đam, ƀar păh hlôi lăng hơlen tôm tong rim tơdrong jang hơdoi ƀar tĕh đak păng chơt hơ iă mư̆h ƀô̆h tơgoăt tơgoăl Jang hơdoi gĭt kăl Việt Nam - New Zealand tŏk bŏk atŏk tơ iung ‘lơ̆ng liĕm păng jơnei; mă kăl, mơdro sa ƀar păh hơnơ̆ng tŏk lơ. Ƀar Thủ tướng jei tơlĕch rim trong vă hơnhăk tơgoăt tơgoăl Jang hơdoi gĭt kăl Việt Nam - New Zealand hơnơ̆ng atŏk tơ iung pran kơtang hlŏh dơ̆ng lơ̆m khei năr kơnh, kơ yuơ đei iŏk yua ăn pơđĭ ƀar tĕh đak, tơgop lơ̆m rơngei hiôk hian, hơnŭk hơnoa, jang hơdoi păng atŏk tơ iung tơ̆ châu Á - Thái Bình Dương