VOV4.Bahnar - Kơ sơ̆ 10/1, Thủ tướng tĕh đak Việt Nam Phạm Minh Chính păng Thủ tướng tĕh đak Lào Phankham Viphavanh tơ ƀâp bơ ngai tĕch mơ dro 2 tĕh đak.

Thủ tướng Việt Nam păng Thủ tướng Lào tơ ƀâp bơ ngai tĕch mơ dro kơ 2 tĕh đak

Tơ̆ jơ tơ ƀâp hăm kơ dră chĕp kơ̆l 2 tĕh đak, bơ ngai tang măt ăn dôm anih tĕch mơ dro tih kơ Việt Nam păng Lào pơ ma hơ dăh đon ‘mĕh jang hơ doi đunh đai, kơ jăp ‘lơ̆ng, pơ ma tơ lĕch lơ nơ̆r apinh hăm Khul kơ dră tĕh đak păng dôm anih tơm, anih jang kơ pal kơ 2 tĕh đak. Dôm anih tĕch mơ dro pơ ma hơ dăh đon pơ hnŏng jang kĕh hrôih dôm tơ drong jang tih, gĭt kăl tŏk bŏk đei tơ lĕch jang vă tưk tơ iung tơ drong jang hơ doi mŭk drăm đơ̆ng 2 tĕh đak.

Pơ ma lơ̆m jơ tơ ƀâp, Thủ tướng tĕh đak Việt Nam Phạm Minh Chính athei dôm anih tơm, anih jang kơ pal, tơ ring tơ rang păng anih tĕch mơ dro kơ 2 tĕh đak hơ tŏk trong tơ guăt băl, tơ gŭm băl đơ̆ng 2 anih jang mŭk drăm Việt Nam – Lào tơm hlŏh jĭ găh trong pơ gơ̆r jang, jên hu, trong nơ năm, unh hơ yuh, kơ măy roi tơ băt, chă tơ mang lăng, jang hơ doi mŭk drăm 3 tĕh đak Việt Nam – Lào – Campuchia păng dôm tĕh đak nai lơ̆m tơ ring.

Dơ̆ng: Tơ blơ̆