VOV4.Bahnar  – Kơsơ̆ năr 28/9, Thủ tướng Phạm Minh Chính xơng ƀok Charles Kaye, Kơdră dơnơm kơ Anih Mong jên kơpal teh Axong jang Warburg Pincus (Hoa Kỳ). Thủ tướng bơnê kơ tơdrong tơbôl jang hadoi Việt Nam – Hoa Kỳ pơtoi hơtŏk tơ iung; tĕch pơdro 2 păh pơtoi đei hơtŏk kăp gĭt, đei jơnei jê̆ 87 rơtăl đôlar lơ̆m 8 khei blŭng xơnăm 2022, tŏk pơhlom 20% pơtêng hăm khei năr âu xơnăm 2021.

Hoa Kỳ pơtoi jing tơring răt lơ tơmam drăm đơ̆ng Việt Nam, lơ̆m kơplăh Việt Nam jing teh đak jang tĕch pơdro pran mă 9 kơ Hoa Kỳ lơ̆m kơpal teh păng jing teh đak jang pran hloh lơ̆m ASEAN. Thủ tướng pơkăl Warburg Pincus hăm tơring tĕch răt lang xă lơ̆m kơpal teh pơtoi jing gơng tơroh vă hơ 'nhăk dôm anih axong jang Hoa Kỳ pơma adrô̆ păng teh đak đe pơma atŭm truh axong jang tơ̆ Việt Nam; atŭm hăm noh, pơtoi pơih xă, hơtŏk dôm tơdrong jang tĕch răt 'nao, mă hăt noh lơ̆m tơdrong pơjing unh hơyuh xơđơ̆ng 'lơ̆ng, hơtŏk jang kŏng ngĭp hơmet unh hơyuh xơđơ̆ng păng hăt hot vang tơgop nơ̆r tơlĕch tơchơ̆t hăm Việt Nam.

VOV/Lan pơre păng tơblơ̆ nơ̆r