VOV4.Bahnar - Tơ̆ jơ tơ ƀơ̆p muh măt khŭl đă ƀŏng lŏng drŏ kăn teh đak kơ sơ̆ ‘năr 10/2, Thủ tướng Teh đak Phạm Minh Chính pơ ma hơ dăh: Hăm dôm tơ drong jơ nei, tơ drong hơ drin ‘lơ̆ng vă ‘măng mă blŭng lơ̆m jơ hnơr arih Khŭl đă ƀŏng lŏng drŏ kăn teh đak đơ̆ng bơ̆n iŏk đei gơh vang pơ long  World Cup 2023, ĭnh gô krao ‘noh “ dôm drŏ kăn kim cương” păng “bơ ngai pơ tâp pơ hrăm kim cương” kơ đă ƀŏng lŏng tơ plŏng kơ dâu Việt Nam. Thủ tướng Phạm Minh Chính pơ ma hơ dăh, tơ drong khŭl đă ƀŏng lŏng drŏ kăn teh đak iŏk đei gơh pơ long truh World Cup ‘noh jĭ jơ nei tih hloh lơ̆m jơ hnơr arih đă ƀŏng lŏng Việt Nam.

Khŭl đă ƀŏng lŏng drŏ kăn Việt Nam vang phĭn hơ dai

Jơ nei âu ‘noh tơ drong hiôk chơt ăn pơ đĭ lơ̆m teh đak lơ̆m dôm năr blŭng sơ năm ‘nao. Thủ tướng ‘meh akhan Khŭl đă ƀŏng lŏng ling lang vei kơ jăp jơ hngơ̆m hơ drin ‘lơ̆ng vă iŏk đei jơ nei pơ long ‘lơ̆ng hloh tơ̆ dôm ‘măng pơ long đơ̆ng rŏng dơ̆ng, ƀơ̆t măt ‘noh vei lăng jơ nei đă pran hloh tơ̆ SEA Games 31 lơ̆m khei 5 truh. Kŭm tơ̆ jơ tơ ƀơ̆p muh măt, tang măt Anih jang Khŭl kơ dră teh đak pơ jao 4,5 ti hlak jên (đơ̆ng jên tơ pôl vang tơ ra); anih jang Olympic Việt Nam pơ jao 3,6 ti hlak jên; Anih mong jên tơ mơ̆t jên jang hơ tŏk tơ iung Việt Nam pơ jao 2 ti hlak jên; Grŭp jang TH pơ jao 1,5 ti hlak jên ( đei hloi 1 ti jên măt păng tơ mam) asong ăn Khŭl đă ƀŏng lŏng drŏ kăn teh đak Việt Nam.

Thuem: Tơ blơ̆