VOV4. Bahnar - Lăp lơ̆m hlŏh 4 jơ, jô̆ đơ̆ng 2 jơ 8 pơnĭt kơsơ̆ trŭh 6 jơ 4 pơnĭt drung kơsơ̆ năr 23/8, tơ̆ apŭng Kon Plông, dêh char Kon Tum hlôi đei hơnơ̆ng 7 ‘măng tĕh tơdrŏ. Rim ‘măng tĕh tơdrŏ tĭh rih hloi, đei ƀô̆h lơ̆m khei ‘năr pơm kiơ̆ mong đak kơ dơnau mong đak hnam kmăi đak tơlĕch ŭnh hơyŭh Thượng Kon Tum tŏk bŏk đei lơ bơngai khoa hŏk lăng akhan mĭnh lơ̆m dôm tơdrong tơm pơm ăn tĕh tơdrŏ tơ̆ apŭng Kon Plông, dêh char Kon Tum.

Dơnau mong đak hnam kmăi đak tơlĕch ŭnh hơyŭh Thượng Kon Tum tŏk bŏk đei lơ bơngai khoa hŏk lăng akhan mĭnh lơ̆m dôm tơdrong tơm pơm ăn tĕh tơdrŏ tơ̆ apŭng Kon Plông, dêh char Kon Tum

Kơtơ̆ng ang đơ̆ng Dơnŏ anĭh vei lăng kon pơlei apŭng Kon Plông đei ƀô̆h, tim mă băt hơdăh tơdrong hiong răm dang yơ đơ̆ng rim ‘măng tĕh tơdrŏ âu, lăp đei 1 ŭnh hnam oei tơ̆ pơlei Đak Chơ, tơring Đak Ring đei ƀơm kơnê̆. Mă hơdăh, tơ̆ pơbŭng rŏng hnam đĭ pă gan kơ jăp đei gŏch huŏng. Kơdră chĕp pơgơ̆r tơring Đak Ring hlôi ăn kang ƀô̆ năm dăr lăng păng tơgŭm ŭnh hnam hơmet pơ ‘lơ̆ng hloi. ‘Ngoăih kơ ‘nŏh Dơnŏ anĭh vei lăng kon pơlei apŭng tim mă tơroi tơbăt hơdăh tơdrong hiong răm găh bơngai păng mŭk drăm yuơ đơ̆ng tĕh tơdrŏ pơm ăn.

Tơblơ̆ nơ̆r: Amazưt