VOV4.Bahnar - Anih tơm vei lăng Kŏng an pơ gơ̆r Lêh tơ băt 20 sơ năm Năr pơ jing Anih jang hơ len lăng kơ Đảng Kŏng an Trung ương. Yak hloh 20 sơ năm pơ jing, jang đei Anih jang âu hlôi jang tơ gŭm hơ tŏk loi dơ̆ng tơ drong chĕp kơ̆l, pơ gơ̆r, pơ tho găh hơ len lăng, dăr lăng, ki luơ̆t Đảng lơ̆m Kŏng an kon pơ lei. Anih jang hơ len lăng hlôi kơ chăng jang tơ gŭm kơ Đảng Kŏng an Trung ương tơ lĕch jang kiơ̆ lơ trong jang hơ len lăng, dăr lăng tơ drong jang, hơ len lăng mưh đei ƀôh pơm glăi. Kiơ̆ đơ̆ng noh, tơ gŭm lơ kơ dră đảng, khŭl jang Đảng, đảng viên tơ tom hơ met ‘ming tơ drong ưh kơ ‘lơ̆ng, ưh kơ lê̆ pơm glăi iĕ jing pơm glăi tih.

Kơ dră tơm Tô Lâm pơ ma tơ̆ lêh tơ băt

Pơ ma tơ̆ jơ lêh, kơ dră Anih tơm vei lăng Kŏng an Tô Lâm athei tơ̆ hơ năp kơnh, Anih jang hơ len lăng kơ Đảng Kŏng an Trung ương kăl hơ nơ̆ng vei kơ jăp trong jang tơm “ dăr hơ len athei pơ̆ih să, hơ len lăng athei đei tơm, kăl”. Hơ dai hăm ‘noh tŭn pran hơ len lăng, dăr lăng tơ drong chĕp kơ̆l, pơ gơ̆r jang kiơ̆ tơ drong jang pơ jing, hơ met ming Đảng păng tơ drong jang chĭnh trĭ; khŏm tang găn, sek phak kơ hret kang ƀô̆, đảng viên ưh kơ ‘lơ̆ng găh đon tơ chĕng, chĭnh trĭ, jơ hngơ̆m đon, trong arih sa.

Thuem: Tơ blơ̆