VOV4.Bahnar - Ƀok Võ Văn Thưởng, Kơ dră chĕp kơ̆l Ban Bí thư tang măt ăn Anih tơm Chinh trĭ ‘nao kĭ tơ lĕch tơ drong Hơ găt 65 đơ̆ng Anih tơm Chinh trĭ găh tơ drong tơ plih kăn ƀô̆. Kiơ̆ đon tơ chĕng găh tơ plih kăn ƀô̆ bơ̆ jang ‘nŏh jĭ 1 lơ̆m dôm tơ drong jang kăn ƀô̆, tơ drong hơ găt 65 đei tơ lĕch vă tơ plih ‘nao tơ drong tơ plih kăn ƀô̆ bơ̆ jang, pơm ‘lơ̆ng, kơ jăp ‘lơ̆ng, rơ đăh rơ đong, hơ tŏ băl; ưh ăn đei tơ drong ưh hơ iă lơ̆m tơ drong jang kăn ƀô̆. 

Tơ drong hơ găt chih hơ dăh rim bơ ngai, rim kơ chư̆k vă tơ plih băl bơ̆ jang, kiơ̆ kơ ‘nŏh jĭ tơ plih đơ̆ng jang kơ pal jur jang tơ̆ hơ la, đơ̆ng hơ la tŏk tơ̆ kơ pal, đơ̆ng tơ ring ‘nâu năm jang tơ̆ tơ ring to; đơ̆ng dôm anih jang, khul grŭp lơ̆m rim anih jang chinh trĭ. Hăm kăn ƀô̆ đei rơih hơ met vă pơm tih, pơm bơ ngai vei lăng.

Tơ drong hơ găt athei, dôm anih jang kơ pal tơ chơ̆t tơ plih kăn ƀô̆ athei chĭu pŭ hơ năp jang, chih pơ jing trong tơ plih kăn ƀô̆, hơ met anih jang, tơ drong jang ăn kăn ƀô̆ đơ̆ng rŏng kơ tơ plih; bơ̆ jang kiơ̆ trong hơ găt, tơ păt ‘lơ̆ng, rơ đăh rơ đong; hơ len năng, sek tơ lang tơ drong glăi; vei lăng năng hơ len dơ̆ng rim sơ năm hăm kăn ƀô̆ đei tơ plih; chih pơ tôch mă rơ đăh tơ drong jang tơ plih kăn ƀô̆.

Dơ̆ng: Tơ blơ̆