VOV4.Bahnar -  Kiơ̆ pơ tôch hơ len lăng kơ sô̆ kĕ pơ jei kơ dêh char sơ   năm 2021, PCI kơ Dak Nông tŏk 8 kơ nao pơ têng hăm sơ năm hơ drol, đơ̆ng hơ tuch kơ ƀang chih pơ rĕng yak tŏk grŭp jô̆ păh lăp kơ lơ̆m teh đak. Pơ tăl tơ drong jơ nei âu, Dak Nông tŏk bŏk hơ drin hơ met ‘lơ̆ng pran kơ tang hơ nih tơ mơ̆t jên jang tĕch mơ dro vă sơng đei dôm bơ ngai tơ mơ̆t jên jang, pơm hơ yak ‘lơ̆ng lơ̆m hơ tŏk tơ iung mŭk drăm tơ pôl.

        Ƀok Nguyễn Đức Lộc, Kơ dră dơ nơm vei lăng kŏng ti Vạn Thương - Dak Nông, tơ băt, anih jang mơ dro sa gơh bơ̆ jang hăm Dak Nông đơ̆ng 3 sơ năm hơ drol, mă lei athei truh hơ tuch sơ năm 2021 mă tơ pă tơ lĕch jang 2 tơ drong jang tơ mơ̆t jên jang lơ̆m dêh char.

        Đơ̆ng rŏng tơ drong jang hơ pơi ‘meh Dak Nông ‘noh ĭnh ƀôh rơ đăh tơ drong tơ plih tôch kơ tih đơ̆ng kơ dră chĕp lơ̆m dêh char truh rim anih jang hlôi mơ̆t jang 1 trong pran kơ tang hloh pơ têng hăm hơ drol sơ̆, hlôi tơ tĕnh hơ met pơ ‘lơ̆ng dôm hla ar ăn anih jang mơ dro sa mơ̆t tơ mơ̆t jên jang. Dang ei ‘noh nhôn tŏk bŏk tơ lĕch jang dôm tơ drong jang hlôi đei asong ăn tơ mơ̆t jên jang, ‘noh đei 1 hơ nih choh jang sa kơ măy kơ mŏk ‘nao tơ̆ Gia Nghĩa păng 1 hnam kơ măy pơm tơ lĕch ‘long kram ep tơ̆ Tuy Đức.

Tơ drong jang “ Tơ drong hơ pơi ‘meh Dak Nông” pơ gơ̆r khei 10/2021, mĭnh tơ drong hơ iă lơ̆m sơng đei tơ mơ̆t jên jang kơ dêh char

        Tŏk bŏk hơ tŏk tơ drong jang ming man 1 ‘măng 2 tŏ hnam pơ gang tơ̆ pơ lei tơm Gia Nghĩa păng Cư Jút, tơ̆ dêh char Dak Nông ngăl, Tiến sỹ bác sỹ Nguyễn Văn Châu, Kơ dră dơ nơm vei lăng tơ drong jang hnam pơ gang Xuyên Á, akhan, tơ drong hơ iă blŭng a ƀơ̆t truh tơ̆ tơ ring ‘nao ƀơm ưh kơ ‘lơ̆ng tôch kơ tih truh tơ drong tơ chơ̆t tơ mơ̆t jên jang đơ̆ng anih jang mơ dro sa. Iŏk pơ tih gia găh ‘măng tơ ƀơ̆p hăm Kơ dră Anih vei lăng kon pơ lei dêh char Dak Nông, ƀok tơ băt, tơ drong tơ năp đơ̆ng kơ dră chĕp kơ̆l hlôi pơm ăn anih jang mơ dro sa tơ chơ̆t tơ mơ̆t jên jang pơm dơ̆ng 1 hnam pơ gang lơ̆m dêh char ‘nâu. Tơ drong hrei ‘nâu ‘noh jĭ tơ drong tơ ƀôh hơ dăh đơ̆ng kơ dră chĕp kơ̆l dêh char truh rim anih jang, tơ ring, gơh jang hơ dai tơ gep bơ̆ jang 1 ‘măng lơ hla ar tơ mơ̆t jên jang. Tơ drong hơ met pơ ‘lơ̆ng hla ar tơ tĕnh ưh khan lăp tơ ƀôh tơ drong hơ pơi ‘meh, khŏm jang đei đơ̆ng dêh char, mă oei tơ gŭm bơ ngai tơ mơ̆t jên jang tơ gĕch iŏk jơ năr hiôk, kơ chăng dôm tơ drong găh rŏng. Ƀok Nguyễn Văn Châu tơ roi:

        Anih jang mơ dro sa ‘meh tơ drong tih hloh ‘noh jĭ yă kiơ: Hrĕnh! Mă ‘meh hrĕnh ‘noh athei rơ đăh, tơ păt, ‘lơ̆ng, ‘noh athei hơ met pơ ‘lơ̆ng hơ nơ̆ng rim tơ drong vă pơm liơ bơ ngai tơ mơ̆t tơ jên jang đei jơ nei hrĕnh hloh. Mă đơ̆ng dôm hla ar kiơ̆ tơ drong hơ găt ‘noh tôch kơ lơ, kăl kơ roi tơ păt hơ dăh akhan tơ mơ̆t jên jang tơ drong ‘nâu kăl kơ dôm kơ loăi hla ar, tơ mơ̆t jên jang pơm tơ drong ‘nâu thoi yơ ‘noh rơ đăh rơ đong. Sa roi rơ đăh, tơ păt sa roi lui ngeh, rơ dăh roi lơ tơ drong lui ngeh roi lơ păng ƀơ̆t doh roi ưh kơ hli kơ glăi.

Mĭnh puăt blŭng sơ năm 2022, dêh char Dak Nông hlôi sơng đei 11 tơ drong jang, akŏm đĭ đăng jên tơ mơ̆t jang 1000 ti hlak jên

       Kiơ̆ pơ tôch hơ len lăng kơ sô̆ kĕ pơ jei kơ dêh char sơ năm 2021, PCI kơ dêh char Dak Nông iŏk đei 61.95 điểm, dơ̆ng mă 52/63 dêh char, pơ lei tơm lơ̆m teh đak, tŏk 8 kơ nao pơ têng hăm sơ năm hơ drol. Đơ̆ng grŭp dơ̆ng hơ tuch, dêh char hlôi yak tŏk găh grŭp jô̆ păh lăp. Phŏ tổng thư ký Liên đoàn mơ dro sa păng kơ măy kơ mŏk Việt Nam - ƀok Đậu Anh Tuấn, akhan, Dak Nông hlôi hơ met ‘lơ̆ng kơ sô̆ kĕ pơ jei kơ dêh char tôch kơ hơ iă păng tôm tơ drong. Lơ̆m dôm kơ sô̆ tơ drong ‘noh đei 7 kơ sô̆ tŏk điểm, 6 kơ sô̆ tŏk kơ nao; mă loi ‘noh jĭ dôm kơ sô̆ găh tơ drong hơ bĕch hơ băl iung jang hơ drol đơ̆ng khŭl kơ dră chĕp kơ̆l tơ ring, jên khei ‘năr, trong jang khôi luơ̆t tŏk hloh  20 jăl pơ têng hăm sơ năm hơ drol. Trong jang hrei ‘nâu anih jang mơ dro sa tơ mơ̆t jên jang lơ̆m dôm tơ ring oei ưh kơ đei kiơ nhen Dak Nông, jĭ tơ drong hiôk vă dêh char kĕ pơm đei ƀai hŏk jơ nei ‘nao:

        Ĭnh akhan Dak Nông tam mă jing 1 dêh char năm hơ drol lơ̆m sơng iŏk tơ mơ̆t jên jang mă lei Dak Nông gô năm tôch kơ hrĕnh. Hmă hmă dôm bơ ngai tơ mơ̆t jên jang gô rơ̆ih lơ̆m tơ ring mă tơ̆ noh hiôk ăn rim tơ drong jang tĕch mơ dro, ‘noh ưh khan lăp jing găh tơ mam ‘lơ̆ng mă đe ƀôh tơ̆ tơ drong pơ kăp tôch kơ ‘lơ̆ng đơ̆ng khŭl kơ dră chĕp kơ̆l tơ ring. Dak Nông kŭm tôch kơ hơ pơi ‘meh păng đei 1 trong tơ lĕch jang mă hơ dăh vă hơ vơn, sơng đei jơ nei dôm tơ drong jang tơ mơ̆t jên jang tih, păng ‘nâu jĭ trong vă jang tôch kơ ‘lơ̆ng gô pơm ăn tơ drong tơ plih tih kơ dêh char tơ̆ hơ năp kơnh.

Đei lơ tơ mam ‘lơ̆ng lơ̆m iŏk jang, choh jang sa, tơ mang lăng, Dak Nông hơ mĕng gô pơm tơ drong ‘lơ̆ng găh sơng đei tơ mơ̆t jên jang, hơ tŏk tơ iung mŭk drăm tơ pôl

        Kiơ̆ kơ ƀok Hồ Văn Mười, Kơ dră Anih vei lăng kon pơ lei dêh char Dak Nông, dôm tơ drong tơ plih ‘lơ̆ng PCI âu ki pơm tơ drong kơ hret tôch kơ tih vă dêh char athei hơ met ming pran kơ tang hloh dơ̆ng. Kơ dră chĕp kơ̆l dêh char kŭm nhen dôm anih jang hơ nơ̆ng tơ ƀơ̆p pơ ma dơ nuh hăm tơ pôl jang mơ dro sa, dăr hơ len, hơ met pơ ‘lơ̆ng dôm tơ drong mơ mat tat tơ hlăk tơ hlĭn. Hăm jơ hngơ̆m đon ‘meh vă băt, Dak Nông ling lang răp mơ̆ng nơ̆r tơ gop đơ̆ng dôm jang mơ dro sa, hơ len lăng nơ̆r tơ gop đơ̆ng dôm bơ ngai joăt jang, hŏk pơ hrăm tơ drong hlôh vao đơ̆ng rim dêh char dơ̆ng hơ drol lơ̆m teh đak găh PCI… vă tơ chă trong jang sơng đei tơ mơ̆t jên jang. Ƀok Hồ Văn Mười pơ ma hơ dăh, Dak Nông khŏm pơm ăn hơ nih tơ mơ̆t jên jang, tĕch mơ dro hiôk, tơ păt, pơm đon lui ăn anih jang mơ dro sa bơ̆ jang sơ đơ̆ng păng hơ tŏk tơ iung.

        Mă đơ̆ng đei tơ drong ‘lơ̆ng jang tŏk thoi noh ră, mă lei athei lăng ƀôh hơ dăh ‘noh jĭ jơ nei yak blŭng thoi noh đĕch. Dang ei tơ roi găh Dak Nông ‘noh bu bu kŭm akhan tơ mam tôch kơ tih mă lei ‘long nol tôch kơ lơ. Bơ̆n athei chă trong hơ met ‘lơ̆ng dôm long nol âu, ‘noh jĭ hơ drin 1 jơ hngơ̆m đon hloh dơ̆ng. Dang ei ‘noh hơ len lăng jĭ kơ dră chĕp kơ̆l dêh char păng rim anih jang kơ Dak Nông mơ̆t jang tôch kơ tang tơ gŭm dôm anih jang mơ dro sa, mă lei tơ drong hơ drin ‘noh tam mă tôm, kăl kơ dôm kơ dră chĕp kơ̆l năm truh tơ̆ rim phường, xăh, pơ lei vang hơ drin yak hơ dai ‘noh ĭnh lui pă jor gô jơ nei ‘lơ̆ng.

 Minh Huệ: Chih

Thuem: Tơ blơ̆