VOV4.Bahnar - Pơ long Chih hla ar kơ tơ̆ng ang Teh đak 2021, Khŭl chơ̆m hơ len pơ long ‘măng hơ tuch hlôi rơih đei 152 ƀai chih mơ̆t ‘măng pơ long hơ tuch păng gô pơ jao 10 jơ nei A, 22 jơ nei B, 48 jơ nei C, 35 jơ nei pơ chhơp jơ hngơ̆m ăn kơ dôm ƀai chih`ƀai hơ gei hloh. Kiơ̆ hơ len lăng đơ̆ng bơ ngai tang măt khŭl châm pơ long chih hla ar kơ tơ̆ng ang teh đak 2021, pơ yan pơ long sơ năm ‘nâu đei lơ ƀai chih chă ƀôh đei tơ drong ‘nao, chih tơ blang jrŭ, tơ ƀôh đon hơ gei đơ̆ng bơ ngai chih, tơ drong hơ iă đơ̆ng tơ pôl lăp hăm tơ drong chih kơ tơ̆ng ang hăm ‘nao hrei ‘nâu. Mĭnh ƀar ƀai chih đei hŭt jơ hngơ̆m tơ chĕng tôch kơ dêh, mă loi ‘noh găh dôm ƀai chiih ƀơm truh tơ drong jĭ hơ buh COVID-19. Hlôi đei lơ ƀai chih tơ păt, ƀrơ̆k kơ jơ hngơ̆m pơm ăn bơ ngai đŏk lăng lăp đon, tơ ƀôh tơ drong hŭt jơ hngơ̆m klơ̆m hơ kâu đơ̆ng bơ ngai chih kơ tơ̆ng ang hla ar kơ tơ̆ng ang, đei tơ drong păr ang ‘lơ̆ng hơ iă lơ̆m tơ pôl.

Kiơ̆ hơ len lăng atŭm, dôm ƀai chih vang pơ long lăp hăm dôm tơ drong hơ găt, chă rơ̆ih đơ̆ng Khŭl châm hơ len, hơ păh tơ mam, tơ ƀôh hơ dăh tôm tơ drong lơ̆m tơ drong arih sa, chĭnh trĭ, mŭk drăm, joh ayŏ, tơ pôl, vei sơ đơ̆ng teh đak, jang tơ bôl đơ̆ng teh đak bơ̆n lơ̆m sơ năm 2021. Dôm ƀai chih tơ ƀôh hơ dăh tơ drong hŭt jơ hngơ̆m, tơ chĕng hơ len lơ ƀơm truh jĭ Covid-19 ‘noh lơ hloh lơ̆m rim kơ loăi ƀai chih kơ tơ̆ng ang. Lơ ƀai chih iŏk đei jơ nei kơ jung tơ ƀôh hơ dăh tơ drong hŭt jơ hngơ̆m klơ̆m hơ kâu đơ̆ng bơ ngai chih tơ roi hăm tơ drong tơm hơ nhăk ba dôm tơ drong đei tơ pă hloh găh tơ drong arih sa, mơ̆t lơ̆m jơ hngơ̆m đon lơ bơ ngai đŏk, lăng.

Tơ drong pơ long ‘măng âu, Anih radio nơ̆r pơ ma Việt Nam đei lơ ƀai chih tôch kơ hơ gei, ‘lơ̆ng hơ iă. Lơ̆m noh đei 2 jơ nei A, 2 jơ nei B păng 1 jơ nei C. 2 jơ neii A jei kơ ƀai “Dôm năr ưh kơ hiơt” đơ̆ng grŭp chih Nguyễn Vũ Duy, Bùi Thị Thu Trang, Nguyễn Thị Minh Hạnh (Anih chih tơ roi tơ drong kơ tơ̆ng ang-VOV1) păng Grŭp 4 ƀai “Jơ nglăng trong gre oei rong bu tơ pă”? đơ̆ng grŭp chih Trang Công Tiến, Phạm Trung Tuyến, Nguyễn Hữu Thịnh, Chu Trung Đức, Nguyễn Hải Bằng (Kênh VOV Giao thông). 2 ƀai chih iŏk đei jơ nei B ‘noh jĭ “ Tơ drong tơ blăh đơ̆ng dôm tơ drong tam ƀyơh đei” đơ̆ng grŭp chih Đinh Thị Thu Trang, Kiều Thanh Phượng, Nguyễn Thị Ánh Tuyết, Lê Phương Thảo, Phạm Thị Thu Trang (Anih tơ roi găh tơ drong joh ayŏ kơ dŏ soang tơ pôl –VOV2) păng “ Pơm ƀĕng bŏng ôn hơ la tơ drong tơ mơ̆t jên jang lơ̆m pơ yan jĭ hơ buh” đơ̆ng grŭp chih Nguyễn Sỹ Đoan, Nguyễn Phú Huân, Nguyễn Văn Tùng, Nguyễn Duy Bùi (Anih pơ dăh ti vi ki thuơ̆t sô̆ VTC) .

Lơ̆m noh, ƀai chih iŏk đei jơ nei A “Dôm năr ưh kơ hiơt” đơ̆ng grŭp chih Nguyễn Vũ Duy, Bùi Thị Thu Trang, Nguyễn Thị Minh Hạnh – Khŭl chih hla ar tơ roi kơ Anih radio nơ̆r pơ ma Việt Nam hlôi chih tơ roi truh dôm tơ drong tôch gĭt kăl lơ̆m tơ drong jang tang găn jĭ Covid-19 mă lei đei chih tơ ƀôh kiơ̆ trong lăng đơ̆ng kơ dih, tôch hơ gei. ‘Noh jĭ ƀai chih tơ ƀôh hơ dăh tơ drong pran đơ̆ng radio, chih iŏk nơ̆r pơ ma kơ tă tơ̆ anih đei tơ drong jĭ, mă loi ‘noh jĭ đon jang tôch tơ năp đơ̆ng bơ ngai chih tơ drong kơ tơ̆ng ang, ưh kơ hli tơ drong mơ mat tat, krê hơ mơt ƀơ̆t năm truh tơ̆ dôm tơ ring đei jĭ nhen Bạch Mai, pơ lei tơm Hồ Chí Minh…Dơ̆ng tang ăn grŭp chih, bơ ngai chih hla tơ roi Bùi Thị Thu Trang (VOV1) tơ băt: Vă đei tơ drong tơ roi ‘lơ̆ng, tơ pă,pơm ăn bơ ngai mơ̆ng, lăng lăp đon lơ̆m khei ‘năr đei jĭ hơ buh kơ tang, ƀơm ưh kơ ‘lơ̆ng, đĭ đăng bơ ngai, tơ drong tơ roi đei chih dang 2 sơ năm lơ̆m teh đak tơ lĕch jơ hngơ̆m tơ jră jĭ hơ buh Covid - 19 (2020-2021), ekip hlôi chih đei ƀai tôch kơ hơ iă tơ găl hăm bơ ngai chih tơ drong kơ tơ̆ng ang ăn Radio nơ̆r pơ ma kơ Teh đak, hăm dôm nơ̆r pơ ma, jơ va re, pơ̆ih tơ roi trŏ tơ drong, tôch kơ hơ iă păng tơ ƀôh lơ tơ drong ‘nao, hăm dôm nơ̆r tơ băt nhop kơ đon, tơ tă ăn rim jơ hnơr đơ̆ng rŏng – mưh mơ̆ng dơ̆ng ƀai chih ‘nâu.

“Kăl kơ pơ ma, tơ dăh đei tơ drong hmă đĕch, tơ drong chih ƀai pơih pơ re tơ păt ‘noh hăm ƀai chih âu, ekip 3 ‘nu bơ ngai – 1 ‘nu ‘noh F0, tơ̆ anih đei jĭ tôch kơ dêh pơ lei tơm Hồ Chí Minh, mĭnh ‘noh jĭ bơ ngai chih hla ar tơ roi Nguyễn Thị Minh Hạnh, 2 ‘nu uơ oei dơ̆ng ‘noh jĭ bơ ngai chih hla ar tơ roi Nguyễn Vũ Duy – Kơ dră Anih chĕp kơ̆l VOV1 păng ĭnh ‘noh Bùi Thị Thu Trang, đei truh 4 ‘măng athei oei hơ drô̆ kiơ̆ tơ drong hơ găt, kơ na rim tơ drong pơ ma dơ nuh lơ̆m grŭp đei iŏk yua tôch ai dôm kơ măy kơ mŏk ‘nao. Mơ mat tat- long nol kŭm jing tơ drong tôch kơ hơ iă – ƀlŏk hơ nơ̆ng đơ̆ng ekip "Dôm năr ưh kơ hiơt".

Sơ năm 2021, jĭ hơ buh Covid-19 đei hơ lơ̆k dơ̆ng pơm kơ hret tôch kơ dêh truh tơ drong jang, hăm lơ tơ drong krê mă lei sư kŭm hơ nhăk ba lơ tơ drong ‘lơ̆ng ăn dôm bơ ngai chih hla ar tơ roi chu hŭt jơ hngơ̆m klơ̆m hơ kâu lơ̆m dôm tơ drong mơ mat tat kơ tơ drong arih sa tơ pôl, hơ met ming dôm tơ drong mơ mat tat, krê hơ mơt vă gơh mơ̆t tơ̆ hơ nih đei jĭ hơ buh, yak hơ dai hăm khŭl kang ƀô̆, y ƀak si, dôm khŭl linh vang tơ jră hăm tơ drong jĭ. Kiơ̆ kơ ƀok Phạm Mạnh Hùng, Phŏ Kơ dră chĕp kơ̆l, Kơ dră pơ gơ̆r Khŭl chih hla ar tơ roi kơ Anih radio nơ̆r pơ ma Việt Nam, dôm ƀai chih đơ̆ng dôm bơ ngai chih hla ar tơ roi kơ Anih radio nơ̆r pơ ma Việt Nam iŏk đei jơ nei lơ̆m pơ long Chih hla ar kơ tơ̆ng ang Teh đak sơ năm 2021 akŏm lơ̆m dôm tơ drong tôch kơ tơ tŏ. ‘Noh jĭ tơ drong tơ jră hăm jĭ hơ buh Covid-19, tơ lĕch jang tơ drong tơ chơ̆t hop akŏm Đảng vă vei lăng ‘lơ̆ng đon tơ chĕng đơ̆ng Đảng… Kơ lih đơ̆ng dôm tơ drong mơ nat tat yua đơ̆ng jĭ hơ buh pơm tơ lĕch hlôi pơm ăn khŭl chih tơ drong kơ tơ̆ng ang kơ Radio tơ ƀôh hơ dăh tơ drong gơh hơ gei mưh bơ̆ jang mă đei tơ drong kiơ, iŏk yua đon hlôh vao găh kơ măy kơ mŏk ‘nao vă chih tơ roi trŏ ƀlep hăm yan âu,roi tơ ƀôh rim tơ drong ơh sơ ‘ngon, hiong răm đơ̆ng kon pơ lei.

 “Tơ drong đei lơ ƀai chih găh lơ kơ loăi hla ar tơ roi mơ̆t lơ̆m ‘măng pơ long mă hơ tuch tơ ƀôh hơ dăh đon hơ gei tôm tơ drong đơ̆ng khŭl chih hla ar tơ roi ăn VOV găh rim kơ loăi hla ar kơ tơ̆ng ang. ‘Nâu kŭm jing tơ drong tơ ƀôh hơ dăh trong jang, tơ iung pơ jing 1 anih jang chih hla ar kơ tơ̆ng ang găh lơ kơ loăi tơ găl hăm teh đak – anih chih hla ar kơ tơ̆ng ang  tơm dơ nơm kơ teh đak ‘noh jĭ tơ drong tôch kơ trŏ. Lơ sơ năm âu ki bơ̆n tơ lĕch lơ jơ hngơ̆m, jên jang păng kơ plăh dang ei pơ tơm iŏk đei lơ tơ drong jơ nei ‘lơ̆ng hơ iă. Tơ drong jơ nei đơ̆ng pơ yan pơ long chih hla ar tơ roi ‘măng ‘nâu tôch kơ tơ găl pơm tơ iung jơ hngơ̆m hưch hanh ăn khŭl chih hla ar tơ roi kơ VOV”

Hŭt jơ hngơ̆m klơ̆m hơ kâu chu năm truh tơ̆ rim hơ nih mơ mat tat hloh, ƀơ̆t lăp ưh kơ băt lôch hơ rih thoi yơ đơ̆ng grŭp chih Tạ Quỳnh Tư, Kiều Viết Phong, Khŭl chih hla ar tơ roi kơ Radio pơ dăh um rup Việt Nam, iŏk đei jơ nei A găh kơ loăi phim tài liệu hlôi pơm ăn lơ bơ ngai lăng lĕch đak măt hăm dôm um rup tôch tơ pă tơ̆ yan âu. Bơ ngai lăng gơh ƀôh hơ dăh tơ drong chu hŭt hơ kâu đơ̆ng đe y ƀak si lơ̆m tơ drong tang găn jĭ, lơ̆m noh đei hloi tơ drong chu hŭt hơ kâu đơ̆ng dôm bơ ngai chih hla ar kơ tơ̆ng ang ƀơ̆t kuay tơ ƀôh phim ‘nâu. Bơ ngai chih hla ar tơ roi Tạ Quỳnh Tư, Radio pơ dăh um rup Việt Nam, tang măt ăn dôm grŭp chih tơ roi:

“Tơ mam hơ păh pơm ăn kơ ĭnh ƀlŏk truh truh dôm bơ ngai jĭ Covid 19, mă loi ‘noh jĭ đe y ƀak si lơ̆m tơ drong jang tơ jră hăm jĭ tôch kơ krưp krĕnh âu, đe sư hlôi tơ ƀôh ăn kơ ĭnh lơ tơ drong kăp gĭt lơ̆m tơ drong arih sa, băt ‘mêm tơ drong arih păng arih yua kơ tơ pôl.  Iŏk đơ̆ng ĭnh jang chă chih tơ drong tơ roi păng pơ tơm pơm phim tài liệu ‘noh ĭnh hơ nơ̆ng tơ chĕng trong trŏ ƀlep ‘noh sư tơ iung tơ drong hiôk chơt, bơ̆ jang kiơ̆ glăi sư pơm tơ lĕch lơ tơ drong ơh sơ ‘ngon kơ na ĭnh ưh kơ ‘nhoen kiơ khŏm hŭt jơ hngơ̆m klơ̆m hơ kâu lơ̆m dôm tơ drong mă ĭnh tơ chĕng gô tơ iung đei jơ hngơ̆m đon ‘lơ̆ng băt ‘mêm mơ nat lơ̆m rim bơ ngai Việt Nam bơ̆n”.

Kiơ̆ kơ bơ ngai chih hla ar tơ roi Nguyễn Đức Lợi, Phŏ kơ dră Khŭl chih hla ar tơ roi Việt Nam, lơ̆m 2 sơ năm 2020-2021, tơ̆ hơ năp dôm tơ drong krê hơ mơt đơ̆ng jĭ hơ buh Covid - 19,  bơ bgai chih hla ar kơ tơ̆ng kơ dôm anih chih kơ tơ̆ng ang, anih chih hla ar tơ roi hlôi hŭt jơ hngơ̆m klơ̆m hơ kâu tơ̆ dôm hơ nih krê hơ mơt, ƀơ̆t lăp ưh kơ băt vă lôch hơ rih thoi yơ. Kơ lih đơ̆ng jơ hngơ̆m đon nŭih, pơ̆n tơ chĕng, pơ̆n jang đơ̆ng khŭl jang chih hla ar tơ roi hlôi chih tơ roi đei lơ tơ drong,đơ̆ng noh đei anih jang kơ pal vang truh hơ len lăng. ‘Noh jĭ jơ hngơ̆m đon ‘lơ̆ng hloh đơ̆ng bơ ngai chih hla ar tơ roi kăl kơ đei tưk tơ iung hloh dơ̆ng:

“Dôm tơ drong krê hơ mơt, jô̆ hloi lơ̆m tơ drong tang găn jĭ hơ buh ‘noh bơ̆n athei đei jơ hngơ̆m đon nuih chu hŭt jơ hngơ̆m klơ̆m hơ kâu thoi noh. Mă lei jô̆ hloi lơ̆m tơ drong iung jang tang găn sa pơ jĭp, tơ jră plơ̆ dôm tơ drong ưh kơ ‘lơ̆ng kơ lĕ ‘noh gơh tơ roi đei tôch kơ lơ tơ drong krê hơ mơt, đei tơ drong tơ hli, ƀơ̆t lăp đei tơ hli truh hơ kâu jăn đơ̆ng kơ dih kâu bơ ngai chih hla ar tơ roi kŭm nhen đơ̆ng ŭnh hnam đe sư. Nhôn tơ chĕng dôm bơ ngai chih hla ar tơ roi athei hơ met ăn dôm tơ drong kăl gơh jang blŭng a ‘noh athei hlôh vao găh luơ̆t. Tơ pă ‘nei bơ ngai chih hla ar tơ roi mă ưh kơ pơ̆n hŭt jơ hngơ̆m klơ̆m hơ kâu, lêl ưh kơ pơ̆n năm truh tôch tơ drong mă loi lơ̆m tơ drong tang găn sa pơ jĭp’noh bơ̆n ưh kơ gơh chih đei dôm ƀai ‘lơ̆ng hơ iă păng kŭm nhen dôm ƀai chih hơ yơ gơh pơm ăn bơ ngai ‘meh đŏk, lăng.”

Vă gơh hŭt jơ hngơ̆m klơ̆m hơ kâu, dôm bơ ngai chih hla ar tơ roi ling lang đei 1 jơ hngơ̆m hưch hanh hăm tơ drong jang, plei nŭih tơ ƀôh ăn đe sư trong vă năm truh tôch tơ drong , tơ gop pơm ăn tơ pôl ‘lơ̆ng hơ iă hloh ƀlep nhen jơ hngơ̆m đon đơ̆ng dôm bơ ngai jang chih hla ar tơ roi kach mang – ‘noh jĭ “Iŏk tơ drong ‘lơ̆ng hŭt tơ drong kơ nê̆”.

Kim Thanh- Lại Hoa: Chih

Thuem: Tơ blơ̆