VOV4.Bahnar - Pơ gê ‘năr 7/4, tơ̆ Ninh Thuận, 2 dêh char Lâm Đồng păng Ninh Thuận kĭ pơ kăp Tơ drong jang hơ dai hơ tŏk tơ iung tơ mang lăng jăl jang 2022- 2025, lơ̆m noh đei tơ goăt hơ dai pơ lei tơm pơ kao Đà Lạt hăm tơ ring tơ mang lăng đak dơ sĭ Ninh Chữ. Lơ̆m tơ drong jang hơ dai hơ tŏk tơ iung tơ mang lăng Ninh Thuận - Lâm Đồng jăl jang 2022-2025, 2 tơ ring vang pơ ma dơ nuh, tơ gop nơ̆r pơ jing tơ mam tơ mang lăng đơ̆ng 2 păh; pơ jing păng hơ tŏk tơ iung lơ tơ mam tơ mang lăng, tơ goăt hơ dai dôm hơ nih năm truh vă sơng đei tơ moi tơ mang lăng. Ninh Thuận đei tơ mam tơ mang lăng tih hăm dôm tơ mam tơ mang lăng ‘lơ̆ng kơ tơ ring đak dơ sĭ, bri kông păng joh ayŏ kơ kon pơ lei Chăm, Raglai. Oei Lâm Đồng ‘noh đei tơ drong pran găh tơ mang lăng tôch kơ pha hăm ‘năr tơ ngiĕt păng hơ nih pơ dơh ngôi hiôk. Hơ dai hăm ‘noh trong tơ ƀưh Ninh Thuận- Lâm Đồng kŭm jing 1 hơ nih năm truh tơ mang lăng. 2 tơ ring gô jăh pơ jing tour tơ mang lăng "1 ‘măng năm 3 hơ nih truh" ‘noh Đà Lạt – Phan Rang– Nha Trang, sơng tơ moi tơ̆ cham gre păr Liên Khương păng ba tơ moi tơ̆ cham gre păr Cam Ranh, kŭm hăm dôm tơ mam tơ mang lăng ‘lơ̆ng hơ iă vă sơng đei păng pơ dui đunh jơ năr ƀĭch pơ dơh đơ̆ng tơ moi.

Thuem: Tơ blơ̆