VOV4.Bahnar - ‘Năr 2/8, Anih tơm vei lăng găh pơ tho pơ hrăm đei hla ar gơ̆ih kơ rim dêh char, pơ lei tơm găh Trung ương găh tơ drong tơ lĕch jang rơ̆ih iŏk biên chế ăn thây kô pơ tho mầm non, phổ thông kiơ̆ Tơ drong tơ chơ̆t kơ sô̆ 72 đơ̆ng Anih tơm Chĭnh trĭ. Kiơ̆ kơ ‘noh, tơ gŭm hơ drol rơ̆ih iŏk thây kô pơ tho dôm môn hŏk ‘nao vă jang kiơ̆ Tơ drong pơ tho hŏk phổ thông 2018 păng tơ gŭm hơ drol rơ̆ih iŏk ăn kô pơ tho mầm non ăn rim anih pơ tho mầm non tơ̆ tơ ring mŭk drăm - tơ pôl mơ mat tat. Kiơ̆ tơ chơ̆t kơ sô̆ 72 đơ̆ng Anih tơm Chĭnh trĭ, jăl jang 2022 – 2026 tơ mơ̆t dơ̆ng vă jê̆ 66 rơ bâu biên chế thây kô pơ tho, hơ drô̆ sơ năm hŏk 2022-2023 tơ mơ̆t dơ̆ng dang 28 rơ bâu biên chế kô pơ tho mầm non, phổ thông teh đak. Anih tơm vei lăng găh pơ tho pơ hrăm athei rim dêh char, pơ lei tơm akŏm lơ trong jang vă vei sơ đơ̆ng tơ drong rơ̆ih iŏk biên chế thây kô pơ tho nhen: tơ roi jơ̆p jang găh biên chế rơ̆ih iŏk, tơ drong jang hăm rim anih pơ tho pơ hrăm vă đei bơ ngai rơ̆ih iŏk, pơ ma dơ nuh hăm rim tơ ring nai vă jang hơ dai rơ̆ih iŏk kiơ̆ dôm môn hŏk pơm lăp hăm ‘meh vă.

Thuem: Tơ blơ̆