VOV4.Bahnar - Rim grŭp hnam  hơ met hơ drô̆ 1 hnam ăn dôm F0 oei, iŏk yua hnma hŏk hôp tơ pôl pơm hơ nih akŏm hơ met bơ ngai jĭ covid-19 – ‘noh jĭ trong mă kon pơ lei kon kông tơ̆ apŭng Cư Jút, dêh char Dak Nông hơ met pơ ‘lơ̆ng dôm tơ drong mơ mat tat găh tơ mam, hơ nih vă tang găn jĭ covid-19 tŏk bŏk lanh hrĕnh. Dôm tơ drong âu tŏk bŏk hơ tŏk iŏk yua hơ met bơ ngai jĭ covid-19 ttơ̆ tơ pôl, tơ jur hrăt hrot ăn anih jang pơ gang Cư Jút, apŭng tơ ring sơ lam đei truh 48% kơ sô̆ kon pơ lei kon kông.

Hnam ‘lơ̆ng ‘noh jĭ hơ nih 3 ‘nu ƀă kon ƀok Y Thanh Bkrông, oei tơ̆ plei Nui, xăh Tâm Thắng, apŭng Cư Jút, pơm kiơ̆ ăn oei hơ drô̆ hơ met covid-19. Sư tơ roi, ƀơ̆t đei hiĕn, yuh, sư hlôi năm kơ dih tơ̆ hnam pơ gang xăh hơ len lăng hrĕnh ăn ƀôh đei ƀơm jĭ. Pơ̆ih să hơ len lăng pơ đĭ ŭnh hnam, 3 ‘nu ƀơm jĭ covid-19 đei kang ƀô̆ jang pơ gang pơ tho ăn oei hơ drô̆ hơ met tơ̆ hnam. Hơ drô̆ hơ kăn sư ưh kơ đei ƀơm jĭ đei rông ƀôt hơ met ăn oei pơ gia. Đơ̆ng rŏng 1 giĕng ăn oei hơ drô̆ hơ met, kon drŏ nglo đĭ klăih kơ jĭ, sư hăm kon drŏ kăn jơ hngơ̆m jăn kŭm đĭ sơ đơ̆ng bơ̆ih. Ƀok Y Thanh tơ băt:

Ĭnh ‘noh F0. 2 ‘nu ƀă nhi oei tơ̆ hnam. Oei hơ năn oei tơ̆ hnam mŏ. 2 ‘nu ƀă kon nhi sơ đơ̆ng vei lăng jơ hngơ̆m pran păng pơm kiơ̆ 5K. Sơ đơ̆ng găh jơ hngơ̆m jăn lơ̆m khei ‘năr ăn oei hơ drô̆, ưh kơ đei kiơ tơ tăm ôh. Ĭnh hmach kơ ‘nhŏng oh đei jĭ Covid hơ drin pơm kiơ̆ ‘lơ̆ng 5k, pơ lôch pơ rang păng ‘nĕ kơ năm lĕch tơ̆ pơ lei.

Ƀak si Quản Xuân Huân, Hnam pơ gang xăh Tâm Thắng, tơ băt, đơ̆ng hơ tuch sơ năm sơ̆ truh dang ei, lơ̆m xăh Tâm Thắng đei hloh 800 ‘nu jĭ covid-19. Dang ei vă đĭ đăng đĭ klăih kơ jĭ bơ̆ih, lăp oei pă 233 ‘nu hơ met tơ̆ hnam. Tơ̆ dôm pơ lei pơ la oei tŏk bŏk pơ vei lơ grŭp jang covid- tơ pôl, jang hơ dai kơ jăp hăm kang ƀô̆ jang pơ gang jang kiơ̆ tơ drong răp hơ len, pơ tho vei lăng dôm F0 ưh kơ đei tơ drong jĭ dăh mă đei ƀôh jĭ păh lăp tơ̆ hơ nih oei sa.

 Mĭnh pơ lei gô pơ jing đei tôch kơ lơ grŭp jang. Ƀơ̆t mă chă ƀôh 1 ‘nu F0 păng hơ met tơ̆ hnam, hnam pơ gang xăh gô pơ tho trong vei lăng, hơ met, huch pơ gang thoi yơ ăn kơ grŭp jang covid tơ pôl răp hơ len lăng păng pơm kiơ̆ asong pơ gang ăn bơ ngai jĭ. Đang kơ ‘noh đei 1 khŭl jang pơ gang pơ lei, kang ƀô̆ pơ lei, pơm kiơ̆ ăn oei hơ drô̆ pơ vang găn dôm ŭnh hnam đei bơ ngai jĭ, veh ver tơ drong tơ poh lanh lĕch tơ̆ ‘ngoăih.

Tơ̆ tơ ring hơ dral hăm pơ lei tơm Buôn Ma Thuột, kon pơ lei arih sa akŏm tơ ter Trong gre 14, ‘noh đei 1 hơ nih jang kơ măy kơ mŏk kơ dêh char Dak Nông, xăh Tâm Thắng đei kơ sô̆ bơ ngai mơ dro sa lơ, ‘noh jĭ tơ drong hiôk vă jĭ covid-19 lanh hrĕnh. Ƀok Trần Thế Quang, Kơ dră Anih vei lăng kon pơ lei xăh Tâm Thắng, tơ băt, xăh đei hloh 15.300 ‘nu bơ ngai, lơ̆m noh bơ ngai kon kông đei 30%. Tơ drong arih sa kơ kon pơ lei oei lơ mơ mat tat jĭ 1 lơ̆m dôm tơ drong pơ găn lơ̆m tơ drong jang tang găn jĭ covid-19. Khei ‘năr jĭ hơ buh đei ƀôh kơ tang, đei năr lơ̆m 1 pơ lei kon kông chă ƀôh truh 60 ‘nu jĭ ‘nao.

Ƀă kon ƀok Y Thanh Bkrông tŏk bŏk ăn oei hơ drô̆ hơ met tơ̆ hnam

Hơ met pơ ‘lơ̆ng dôm mơ mat tat găh tơ mam drăm, xăh hlôi hơ vơn pơ đĭ tơ pôl vang 1 jơ hngơ̆m hăm dôm tơdrong jang vei lăng F0 đei ƀôh jĭ păh lăp dăh mă ưh kơ đei ƀôh tơ drong jĭ yan âu tơ̆ hơ nih oei sa. ‘Noh jĭ rim grŭp ŭnh hnam hơ met hơ drô̆ 1 hnam ăn bơ ngai jĭ oei; dăh mă F1 mơ̆t oei tơ̆ kang kưt mir, lê̆ hnam oei đei tôm tơ drong hiôk vă F0 ăn oei hơ drô̆. Ƀơ̆t kơ sô̆ F0 lơ dêh hnang, xăh iŏk yua hnam hŏk hôp tơ pôl pơm hơ nih akŏm hơ met bơ ngai jĭ. Ƀok Trần Thế Quang tơ băt, tơ drong vei sơ đơ̆ng tơ mam yua ăn bơ ngai jĭ sơ đơ̆ng ăn oei hơ drô̆ hơ met jĭ kŭm mơ̆ng kiơ̆ lơ̆m tơ pôl păng dôm tơ mam đơ̆ng tơ pôl chă tơ ra.

 Dôm hơ nih hơ met tơ̆ hnam hŏk hôp tơ pôl ‘noh nhôn krao hơ vơn dôm tơ mam chă tơ ra đơ̆ng tơ pôl tơ gŭm phe păng dôm tơ mam yua kăl păng pơ tho vă dôm F0 lơ̆m noh chă pai sa kơ dih vei lăng băl. Hăm dôm grŭp ŭnh hnam ‘noh kŭm kiơ̆ lơ̆m tơ mam đei đơ̆ng ŭnh hnam, tơ mam chă tơ ra đơ̆ng tơ pôl hai, dôm F1 gô gơ̆ih tơ mam sa, tơ mam yua ăn F0. Oei mă lơ F0 lơ̆m 1 ŭnh hnam ‘noh gô pơ tho tơ gŭm vă đe sư chă pai sa vei lăng băl; tơ ring tơ gŭm dôm tơ mam mă kăl hloh. Đei khei ‘năr 1 hnam hŏk hôp tơ pôl nhôn pơm kiơ̆ hơ met jĭ ăn đơ̆ng 20- 25 ‘nu; 1 grŭp ŭnh hnam ‘noh jô̆ păh lăp hơ met ăn dang 6 ‘nu; ‘noh jĭ hăm dôm pơ lei kon kông, mă oei hăm bơ ngai Yuăn ‘noh găh tơ mam, hơ nih ‘noh vei sơ đơ̆ng bơih.

Lei lăi nhen tơ̆ xăh Tâm Thắng, tơ drong jang hơ met bơ ngai jĭ covid-19 tơ̆ dôm tơ pôl bơ ngai kon kông hlôi hơ tŏk đei yua lơ̆m apŭng Cư Jút, dêh char Dak Nông. Kiơ̆ kơ ƀak si Bùi Thị Minh Nghĩa, Kơ dră vei lăng Hnam pơ gang apŭng Cư Jút, dôm tơ drong jang ‘nâu lăp hăm tơ drong joăt oei sa kơ kon pơ lei kon kông kŭm nhen hơ met pơ ‘lơ̆ng tơ drong mŭk drăm mơ mat tat đơ̆ng kon pơ lei. Tơ drong hơ met bơ ngai jĭ covid-19 tơ̆ tơ pôl hlôi tơ jur hrăt hrot tôch kơ tih ăn anih jang mơ dro sa. Jô̆ truh dang ei, lơ̆m apŭng đei vă jê̆ 7000 ‘nu jĭ covid-19, lơ̆m noh đei lơ bơ ngai đĭ klăih kơ jĭ bơ̆ih, dang ei oei vă jê̆ 100 ‘nu hơ met jĭ tơ̆ hnam pơ gang, hloh 2000 ‘nu hơ met tơ̆ hơ nih oei sa.

Mưh kơ sô̆ bơ ngai jĭ tŏk lơ, rim grŭp ŭnh hnam kon pơ lei tơ ring kon kông Cư Jút gô hơ met ăn dôm F0 oei hơ drô̆ 1 hnam

Khei ‘năr tơ jê̆ âu, jô̆ păh lăp rim năr Cư Jút chă ƀôh dang 200 ‘nu jĭ ‘nao. Tơ drong tôch chhôk hơ iă ‘noh jĭ kơ sô̆ bơ ngai jĭ kăl athei hơ met tơ̆ hnam pơ gang tôch kơ tŏ sĕt. Ƀak si Bùi Thị Minh Nghĩa, tơ băt, tơ drong jang tang găn jĭ đei dôm tơ drong hiôk yua đơ̆ng apŭng hlôi ƀet vă tôm vắc-xin jrŭm 3 ăn bơ ngai kơ pal kơ 18 sơ năm, păng kon pơ lei hlôi đei đon băt kơ dih, hlôh vao tang găn jĭ covid-19. Mă đơ̆ng thoi noh, apŭng hlôi hơ met ăn tơ mam vă iŏk hơ met 300 ‘nu jĭ păh lăp, păng hơ met ăn bơ ngai jang pơ gang pơm lăp hăm ‘meh vă hơ met mưh kơ sô̆ bơ ngai jĭ tŏk hrĕnh.

Bơ ngai jang pơ gang kŭm đei dôm bơ ngai ƀơm jĭ, kơ sô̆ tơ drong jang tŏk tŏk ƀơ̆t mă bơ ngai bơ̆ jang ‘noh tơ jur, kơ na nhôn kŭm athei hơ nơ̆ng hơ met ming dơ̆ng bơ ngai jang vă gơh vei sơ đơ̆ng tơ drong jang tang găn jĭ. Dang ei nhôn kŭm hlôi chih măt dôm kang ƀô̆ jang pơ gang pơ dơh hưu, kang ƀô̆ jang pơ gang pơ jing kơ dih lơ̆m apŭng, vă mơh kăl nhôn hơ vơn dôm bơ ngai jang ‘noh ăn năm jang.

Hăm tơ drong 1 jơ hngơ̆m đon đơ̆ng pơ đĭ lơ̆m tơ pôl, khŭl kơ dră tơ ring kŭm hăm anih jang pơ gang, apŭng Cư Jút, dêh char Dak Nông tŏk bŏk kơ chăng dôm trong jang pơm lăp vei sơ đơ̆ng jơ hngơ̆m pran ăn kon pơ lei tơ̆ hơ năp jĭ covid-19./.

Minh Huệ: Chih

Thuem: Tơ blơ̆