Pơgê năr (30/7), hlôi pơgơ̆r Hop akom Kơdră tang măt Đang ƀô̆ phương Xuân Hương- Đà Lạt ‘măng mă I, jăl jang 2025-2030, hăm trong pơchoh ăn tơ iung pơjing phương Xuân Hương-Đà Lạt jing mĭnh tơring kơdrơ̆m tơmang pơhiơ̆, mơdro sa, pơdơ̆h pơdei, gơh hơgei oei sa ‘lơ̆ng hơ iă hloh; đei tơdrong ‘lơ̆ng găh ‘năr rơngơp, cham char ‘lơ̆ng rŏ, oei sa ‘lơ̆ng hơ iă sơ̆ ki păng mŭk drăm hnam oei sơ̆ ki gĭt kăl hơtŏ lơ̆m teh đak, lơ̆m tơring păng apŭng plĕnh teh. Iung pơma tơ̆ hop akŏm, ƀok Y Thanh Hà Niê Kđăm,  Bí thư Đảng dêh char Lâm Đồng athei phương Xuân Hương -Đà Lạt kăl hơlen mă brĕ hloh dơ̆ng dôm tơdrong rơvơn, tơdrong đei đơ̆ng kơdih, sơkơ̆t hơdăh tơdrong kăl, hơnih dơ̆ng, hơnăp jang ‘noh jing tơring pơjing Hơnih bơ̆ jang khul chinh trĭ-oei sa jŏh ayŏ kơ dêh char Lâm Đồng. Vă jang keh đang rim trong jang, trong tơlĕch ăn, ƀok Y Thanh Hà Niê Kđăm athei, ‘ngoăih atŏk kơtang bơ̆ jang tơ iung pơjing Đảng păng khul chinh trĭ rơgoh ‘lơ̆ng, pran kơtang, Đảng bộ phương Xuân Hương - Đà Lạt kăl atŏk kơtang kĕ chĕp pơgơ̆r ‘lơ̆ng, kĕ iung tơjră kơtang đơ̆ng hơnih Đảng tơring hăm tơ iung pơjing khul kang ƀô̆, đang viên kĕ jang keh đang dôm tơdrong jang lơ̆m chăl hle.